ზუგდიდში, ტროტუარებზე ქვაფენილების დამგებმა მუშებმა დღეს მერიის წინ აქცია გამართეს. მათი თქმით, შესრულებული სამუშაოების შედეგად არც ერთ მათგანს ამ დრომდე კუთვნილი ანაზღაურება არ მიუღია. მათივე თქმით, მრავალგზის მცდელობის მიუხედავად ამ დრომდე ვერ იპოვეს პირი, რომელიც ვალდებული იყო მათთვის ხელფასი დაერიგებინა. აქციის მონაწილეებს ქალაქ ზუგდიდის მერიიდან უწყების ქალაქმშენებლობის სამსახურის წარმომადგენელი გამოეხმაურა. მან ადგილზე ჟურნალისტებს განუმარტა, რომ ტროტუარებზე ქვაფენილების დასაგებად გამოცხადებულ ტენდერში გამარჯვებულ კომპანია „გზამგებს“ ხელშეკრულებით გათვალისწინებული თანხა ჩაურიცხეს, თუმცა ამ უკანასკნელმა ცალკე ხელშეკრულება ქვეკონტრაქტორ „ამი 2014“ -თან გააფორმა, რომელიც ვალდებულია მუშებს კუთვნილი ხელფასები ჩაურიცხოს. მოგვიანებით, ქალაქ ზუგდიდის საკრებულოს წევრის ანა წითლიძის ინიციატივით და საკრებულოს თავმჯდომარის თანხმობით აქციის მონაწილე მუშები სხდომაზე მიიწვიეს და მათი მოთხოვნები მოისმინეს. ამასთან, საკრებულოს ფრაქცია „ერთიანი ნაციონალური მოძრაობის“ წევრმა ანი წითლიძემ ქალაქის მერია და ვიცე-მერი გია გულორდავა აღნიშნულთან დაკავშირებით მკაცრად გააკრიტიკა. კერძოდ, დეპუტატის განცხადებით,ტენდერში გამარჯვებულ კომპანიას ვიცე-მერი გია გულორდავა ლობირებდა, დეპუტატის განცხადებით, დაახლოებით ერთი თვის წინ მერიას კონტრაქტორ კომპანიასთან დავალიანება ჰქონდა. მოგვიანებით ჟურნალისტებთან კომენტარი ქალაქ ზუგდიდის ვიცე-მერმა გია გულორდავამ გააკეთა. მან დეპუტატის მიერ მის მიმართ გამოთქმული ბრალდებები უარყო. აქციის მონაწილე მუშების განცხადებით, ისინი ბოლომდე იბრძოლებენ კუთვნილი ანაზღაურების მოსაპოვებლად. ამისათვის კი საგამოძიებო უწყებებსაც მიმართავენ, თუმცა პერმანენტულ საპროტესტო აქციებსაც არ გამორიცხავენ.