ქალაქ ზუგდიდში, არტ გალერეაში არასამთავრობო ორგანიზაცია "არტ-უნივერსალის" ორგანიზებით ქართველი კლასიკოსი მწერლის გურამ დოჩანაშვილის ახალი ნაწარმოების – "ბრმადყოფილზე და…" პრეზენტაცია გაიმართა. სპეციალურად ამ დღისთვის ზუგდიდს თავად კლასიკოსი მწერალი ეწვია და დამსწრეებს თავად წარუდგინა მისი ბოლო ნამუშევარი. წიგნი სამი ნაწილისგან შედგება და ჯერ მხოლოდ მისი პირველი ნაწილია გამოცემული. გურამ დოჩანაშვილის ახალ თხზულებას საფუძვლად სახარებისეული თემა უდევს ბრმადყოფილის შესახებ. "სამოსელი პირველის" შემდეგ ეს მწერლის, სახარებისეულ თემაზე აგებული მორიგი ნაწარმოებია. პრეზენტაციაზე შეკრებილ საზოგადოებას თავად მწერალმა მიმართა. გურამ დოჩანაშვილმა ნაწარმოების შექმნის პერიოდზე ისაუბრა და აღნიშნა, რომ საქართველოს პატრიარქი იყო ის ადამიანი, რომელმაც მას ძალა მისცა დაეწერა ახალი ნაწარმოები.
ღონისძიების ფარგლებში მსურველებისთვის გურამ დოჩანაშვილის ახალი თხზულების "ბმრადყოფილზე და…" გაყიდვა გაიმართა. არასამთავრობო ორგანიზაცია "არტ უნივერსალის" დამფუძნებლის ხატია ჯანაშიას განცხადებით, წიგნები ზუგდიდის არტ გალერეაში დარჩები და მისი შეძენა ნებისმიერ მსურველს 15 ლარად შეეძლება.