ხმაური იყო დღესაც ზუგდიდში, სოხუმის ქუჩაზე მდებარე ავტოსადგურის ტერიტორიაზე, სადაც თბილისის მიმართულებით მოძრავი ავტობუსებისა და მიკროავტობუსების მძღოლები შეიკრიბნენ. სიტუაცია სატრანსპორტო კომპანია „მეტრო პლიუსის“ წარმომადგენლებისა და კომპანიის კუთვნილი ავტობუსის გამოჩენას მოჰყვა, რომელმაც დღეს პირველი რეისი შეასრულა დედაქალაქის მიმართულებით. ადგილზე მობილიზებული სამართალდამცავების დახმარებით „მეტრო პლიუსის“ კუთვნილი ავტობუსი მოწინააღმდეგე მძღოლების პროტესტის და სიტყვიერი შეურაცხყოფის ფონზე მაინც გავიდა. სოხუმის ქუჩაზე მდებარე ავტოსადგურის ტერიტორიაზე მიმდინარე მძღოლების აქციაზე ქალაქ ზუგდიდის მერიის კეთილმოწყობის სამსახურის უფროსიც გამოჩნდა. რა მიზეზით იმყოფებოდა ნუკრი ესართია აღნიშნულ ტერიტორიაზე ამაზე მას ჟურნალისტებთან არ უსაუბრია, მან ავტოსადგურის ტერიტორია უკომენტაროდ დატოვა. დედაქალაქის მიმართულებით მოძრავი ავტობუსებისა და მიკროავტობუსების მძღოლები კვლავ აპროტესტებენ ახალი სატრანსპორტო კომპანიის შემოსვლას ზუგდიდში. მათი განცხადებით, მეტრო პლიუსი თურქული კომპანიაა და მათი თქმით, ისინი კატეგორიული წინააღმდეგნი არიან აღნიშნული კომპანიის შემოსვლით. მძღოლები აცხადებენ, რომ აღნიშნული მოთხოვნით გაფიცვას გააგრძელებენ.რაც შეეხება მეტრო პლიუსს, კომპანიის დირექტორი აცხადებს, რომ ხელშეკრულება ავტოსადგურთან გაფორმებულია და ისინი კანონის სრული დაცვით მუშაობენ. დავით დიდიშვილის განცხადებით, მძღოლების უკმაყოფილების მიზეზი მათ მიერ გაგმზავრების მსურველთათვის შეთავაზებული კომფორტი და უსაფრთხოებაა.მეტრო პლიუსში აცხადებენ, რომ ზუგდიდიდან დედაქალაქის მიმართულებით, სოხუმის ქუჩაზე მდებარე ავტოსადგურის ტერიტორიიდან ყოველდღიურად 3-4 ავტობუსი  ივლის. გაგრძელდება თუ არა მოწინააღმდეგე მძღოლების აქციები სატრანსპორტო კომპანიის წინააღმდეგ, ეს უახლოეს პერიოდში გამოჩნდება.