დასრულდა საკონსტიტუციო ცვლილებების საყოველთაო სახალხო განხილვის საორგანიზაციო კომისიის შემაჯამებელი სხდომა, რომელიც დღეს სასტუმრო "ქორთიარდ მარიოტში" გაიმართა. სხდომაზე განხილულ იქნა ოპოზიციის მიერ ინიცირებული საკონსტიტუციო ცვლილებები, რომელიც საარჩევნო კოდექსშიც უნდა აისახოს.
ცვლილებათა პაკეტი 200 ათასი ამომრჩევლის მიერ საკანონმდებლო ინიციატივის წესითაა წარმოდგენილი და მაჟორიტარულიდან სამხარეო პროპორციულ წესზე გადასვლას გულისხმობს.
ოპოზიცია თვლის, რომ თუ ეს ცვლილებები არ მოხდა, 2016 წლის საპარლამენტო არჩევნებს ლეგიტიმაციის პრობლემა დაემუქრება.
საკონსტიტუციო ცვლილებების საყოველთაო სახალხო განხილვის კომისიამ მიიღო გადაწყვეტილება დღესვე შეიტანოს საკანონმდებლო ორგანოში ოფიციალური წერილი პარლამენტის თავმჯდომარის დავით უსუფაშვილის სახელზე თხოვნით და მოითხოვოს დაჩქარებულ ვადებში მოიწვიოს რიგგარეშე სხდომა იმისათვის, რომ კონსტიტუციური ნორმა იქნას მიღებული.
როგორც კონსტიტუციონალისტები და კომისიის წევრები აცხადებენ, პირველი და მეორე განხილვით ნორმის მიღებას სჭირდება ორი თანმიმდევრული სხდომა, ხოლო მესამე მოსმენამდე სამთვიანი შუალედი უნდა იყოს. ვადები აშკარად შემჭიდროებულია, მაგრამ თუ პროცესი ხელოვნურად არ გაჭიანურდა, სავსებით შესაძლებელია ამ კანონის მიღება საგაზაფხულო სესიის ფარგლებში.
ინტერპარტიული ჯგუფი ცდილობს დაძლიოს წინააღმდეგობა, რომელსაც ხელისუფლება ესოდენ მნიშვნელოვანი ცვლილებებისთვის საჭირო პროცედურული დროის შესაძლო უკმარისობით ნიღბავს, თუმცა კი ყველასათვის აშკარაა, რომ მას ხელს არ აძლევს არჩევნების მოახლოებისა და სახელისუფლებო პარტიების დიდი სისწრაფით კლებადი რეიტინგის პირობებში საარჩევნო სისტემის აგება პროპორციულ წესზე.