საპარლამენტო უმცირესობის ფარგლებში “ერთიანი ნაციონალური მოძრაობა” ახალ ფრაქციას ქმნის, რომელსაც “ნაციონალური მოძრაობა ერთიანი საქართველოსთვის” ერქმევა და ის უმცირესობის ფარგლებში რიგით მეოთხე ფრაქცია იქნება. ახალი ფრაქციის რეგისტრაციის საკითხს ხვალ, საპროცედურო საკითხთა და წესების კომიტეტი განიხილავს.
“ერთიანი ნაციონალური მოძრაობის” ერთ-ერთი ლიდერის მიხეილ მაჭავარიანის ინფორმაციით, ფრაქციაში გაერთიანდებიან: აზერ სულეიმანოვი, კობა ნაყოფია, გიორგი ღვინიაშვილი, როლანდ ახალაია, შოთა მალაშხია და ნიკა ყიფშიძე. ახალ ფრაქციას კი გიორგი ღვინიაშვილი უხელმძღვანელებს.
საპარლამენტო უმცირესობაში აღნიშნავენ, რომ ახალი ფრაქციის ჩამოყალიბების მიზეზი მატერიალური რესურსისა და დროის გამოყენებაა, რომელიც პარლამენტში ფრაქციებს გააჩნიათ.