მკვლელობა მოხდა ზუგდიდში. ოფიციალური ვერსიით, ცოლთან შელაპარაკების შემდეგ 29 წლის ნიკა კვარაცხელიამ თავი მოიკლა. თუმცა, გარდაცვლილის ოჯახის განცხადებით, კვარაცხელია მოკლულია. გარდაცვლილი ნიკა კვარაცხელიას დედის, ნანული ქობალიაა განცხადებით, მისი შვილი მოკლულია და ამას ცხედარზე აღმოჩენილი ძალადობის ნიშნებიც ადასტურებს. ნანული ქობალიას ინფორმაციით, მისი შვილი ნაწამებია. გარადაცვლილის დედა ამბობს, რომ მისი შვილი რძალმა ელისო ქირიამ მოკლა და მიიმალა. გარდაცვლილის ოჯახის განცხადებით, ელისო ქირია პირობითი მსჯავრის ქვეშ იმყოფება. გარდაცვლილის და აცხადებს, რომ სამი წლის წინ ქირიამ ბასრი საგნით მისთვის დაზიანების მიყენება სცადა. ნესტან კვარაცხელიას თქმით, მან სასამართლოში იჩივლა და ბოლო პერიოდი რძალთან არანაირი ურთიერთობა არ ჰქონდა.

გარდაცვლილის ოჯახის წევრთა თქმით, გარდაცვლილმა ცოლის მიერ სოციალურ ქსელში უცხო მამაკაცთან მიმოწერის შესახებ შეიტყო, ურთიერთშელაპარაკების დროს კი ცოლმა მეუღლეს დაზიანებები მიაყენა, ბოლოს კი ცივი იარაღით გულ მკერდის არეში სასიკვდილოდ დაჭრა. კვარაცხელიას ოჯახის წევრების განცხადებით, გარდაცვლილს ზურგსა და იღლიაში, ასევე კისრის მიდამოში ნაკბენი აღენიშნება. 29 წლის მამაკაცის ცხედარი მისმა მეზობელმა იპოვა. როგორც ის აცხადებს, შემთხვევის ადგილზე გარდაცვლილის მეუღლე არ უნახავს.

ზუგდიდში მომომხდარ ფაქტთან დაკავშირებით შსს-მ გამოძიება 115-ე მუხლით დაიწყო, რაც თვითმკვლელობამდე მიყვანას გულისხმობს. როგორც უწყებაში აცხადებენ, ამ ეტაპზე არსებული ინფორმაციით, მამაკაცმა ოჯახური კონფლიქტის დროს ცივი იარაღით თვითდაზიანება მიიყენა მუცლის არეში.