ახალი დეტალებია მოკლული პროკურორის საქმეში. გავრცელებული ინფორმაციით, მკვლელობაში ეჭვმიტანილმა წუხელ თავი მოიკლა. "მოამბის" ინფორმაციით, სავარაუდო მკვლელმა თავი მას შემდეგ მოიკლა, რაც სამართალდამცავები მის კვალზე გავიდნენ. გავრცელებული ინფორმაციით, სამეგრელო-ზემო სვანეთის უფროსი პროკურორი ვახტანგ ქირია ნათესავმა, 50 წლის მამაკაცმა მოკლა. ამ დრომდე უცნობია მკვლელობის სავარაუდო მოტივი, თუმცა ჟურნალისტებისთვის ცნობილი ხდება ის ფაქტი, რომ ბინა, სადაც გარდაცვლილი პროკურორის გვამი აღმოაჩინეს, სწორედ მკვლელობაში ეჭვმიტანილი პირის მიერ მკვლელობისთვის იყო დაქირავებული. ფაქტთან დაკავშირებით პროკურატურას ჯერჯერობით განცხადება არ გაუვცელებია.
სამეგრელო-ზემო სვანეთის საოლქო პროკურატურის უფროსი პროკურორის ცხედარს დღეს პროზექტურიდან ზუგდიდში გადაასვენებენ.
სამეგრელო-ზემო სვანეთის უფროსი პროკურორი 5 დღის წინ სახლიდან გავიდა და მას შემდეგ გაუჩინარდა. ამ დრომდე მას როგორც ახლობლები და ოჯახის წევრები, ასევე სამართალდამცავები ეძებდნენ. ორი დღის წინ სამართალდამცავებმა ქალაქ რუსთავში მისი პირადი მობილური ტელეფონი იპოვეს, თუმცა ამ დრომდე უცნობია გარდაცვლილი პროკურორის ავტომობილის ადგილსამყოფელი.
პროკურორის გაუჩინარების ერთ-ერთ მიზეზად მისი სამსახურეობრივი საქმიანობა სახელდება. კერძოდ, მას ზუგდიდის საოლქო პროკურატურაში ოკუპირებულ აფხაზეთში მომხდარი დანაშაულები ებარა. გავრცელებული ინფორმაციით, პროკურორს ოთხი დღის წინ უცნობმა პირებმა დაურეკეს, რომლის შემდეგ ის სახლიდან გავიდა და მას შემდეგ არ დაბრუნებულა. ამ პერიოდის განმავლობაში მან მობილურ ტელეფონს მხოლოდ ერთხელ უპასუხა.