. მიუხედავად იმისა, რომ მარჯვენასაჭიანი ავტომობილების მფლობელები და მათი მხარდამჭერები სამოქალაქო საზოგადოებიდან კატეგორიულად ეწინააღმდეგებიან ამ სატრანსპორტო საშუალების რეგისტრაციის აკრძალვას , პარლამენტში დარეგისტრირდა შესაბამისი კანონპროექტი, რომელიც ითვალისწინებს საკანონმდებლო ცვლილებებს განბაჟებასთან, რეგისტრაციასთან დაკავშირებით.
ამან მხოლოდ გააძლიერა საპროტესტო განწყობები და, როგორც ჩანს, დააფიქრა ხელისუფლებაში მყოფი პარტიული თანამდებობის პირები, რომელთაც ხელს არ აძლევთ პოტენციური ამომრჩელის განაწყენება მოახლოებული არჩევნების პირობებში. შსს-ს მიერ შემუშავებული საკანონმდებლო ცვლილებების პაკეტის პირველივე განხილვაზე საპარლამენტო კომიტეტებში მათი მხრიდან დადგა კანონპროექტის დამტკიცებისა და ამოქმედების წლის ბოლომდე გადავადების საკითხი იმ მოტივით, რომ ეს დააზარალებს ბიზნესსექტორს, რასაც ეწინააღმდეგებიან საკანონმდებლო ინიციატივის ავტორები, რომლებიც კანონპროექტის დაჩქარებული წესით განხილვას და ძალაში შესვლას 2016 წლის 1-ელი მარტიდან .მოითხოვენ.
მარჯვენასაჭიან მანქანებთან დაკავშირებით ატეხილ აჟიოტაჟს დღეს მთავრობის სხდომაზე პრემიერ-მინისტრი გიორგი კვირიკაშვილი გამოეხმაურა. მან ხაზგასმით აღნიშნა, რომ მარჯვენასაჭიანი მანქანების რეგისტრაციის აკრძალვასთან დაკავშირებით ნაბიჯი უკან არ იქნება. თუმცა საქართველოში არსებული უკვე შემოტანილი მარჯვენასაჭიანი ავტომობილების მფლობელებს თავისუფლად შეუძლიათ მათი გაყიდვა ან გადაფორმება იმდენჯერ, რამდენჯერაც საჭირო იქნება, ამდენად მათ საკუთრებას არანაირი საფრთხე არ ემუქრება.
არავინ ამ ადამიანების საკუთრებას არ ეხება. საუბარი იყო ვადაში შეზღუდვაზე, ახალი პარტიების შემოტანის შეზღუდვაზე. ეს არის აუცილებლად გასაკეთებელი და ამ საკითხში ნაბიჯი უკან არ იქნება. ეს ემსახურება, უპირველეს ყოვლისა, თბილისის მცხოვრებლების ინტერესებს, რადგან დედაქალაქში საშინელი მდგომარეობაა. გადატვირთულია მოძრაობა და ეს სიტუაცია", – განაცხადა კვირიკაშვილმა.