პრეზიდენტმა საარჩევნო ცვლილებებს ხელი მოაწერა – ამის შესახებ განცხადება გიორგი მარგველაშვილმა დღეს გამართულ პრესკონფერენციაზე გააკეთა.
"ეს ცვლილებები არანაირად არ არის ის საარჩევნო რეფორმა, რომელზეც ჩვენ წლებია, ვსაუბრობთ. ეს ცვლილებები განპირობებულია მოთხოვნებით, რომელიც საკონსტიტუციო სასამართლომ თავის გადაწყვეტილებით დაადგინა. შესაბამისად, ეს სრულიად ტექნიკური ტიპის ცვლილებებია და რეალურად საარჩევნო რეფორმა, რომელიც პოლიტიკურ აქტორებს შორის სრულ თანხმობას და თამაშის წესებზე ერთიან შეხედულებას დაადგენდა, ჯერ ჩვენ არ გვაქვს," – განაცხადა მარგველაშვილმა.
ამასთან, ის ხელისუფლებას მოუწოდებს, რომ ცვლილებები პოლიტიკური სპექტრის კონსესუსის საფუძველზე იქნას მიღებული.
"ამასთან ერთად აუცილებელია, რომ 2015 წელს ამ მიმართულებით ჩვენს პოლიტიკურ სპექტრში მნიშვნელოვანი პროცესი წარიმართოს. ფაქტობრივად მთელი პოლიტიკური სპექტრი, როგორც ოპოზიციური პარტიები, ასევე სამთავრობო კოალიცია, ჩამოყალიბდა იმ შეხედულებაზე, თუ რა არის საუკეთესო ქართული საარჩევნო სისტემის ჩამოყალიბებისთვის. პასუხი ამ თვალსაზრისით ნათელია, რომ საუკეთესო არის პროპორციულ სისტემაზე ქვეყნის გადაყვანა.
"განსხვავება მდგომარეობს მხოლოდ იმაში, რა ვადებია ამ პროექტის განხორციელების თვალსაზრისით. მთელი პოლიტიკური სპექტრი, არასამთავრობო ორგანიზაციები, საერთაშორისო პარტნიორები, მეტიც – საქართველოს 240 ათასზე მეტი ხელმოწერით დადასტურებული პეტიცია მხარს უჭერს, რომ ეს განხორციელდეს 2016 წელსვე. ხოლო განსხვავებული პოზიცია არის მმართველ კოალიციაში, რომელიც ამ ცვლილებას 2020 წლისთვის გეგმავს.
"ვფიქრობ, რომ არგუმენტირებული და გასაგები, თუ რატომ უნდა გადავდოთ ის, რაზეც ვთანხმდებით ყველა, რომ კარგია და მისაღებია, კიდევ ოთხი წლით, არ არის და მოვუწოდებ ყველა პოლიტიკურ ძალას, რომ ამ საკითხთან დაკავშირებით უფრო ინტენსიური კონსულტაციების მეშვეობით მივიდნენ ერთობლივ თანხმობამდე," – განაცხადა მარგველაშვილმა.