მთავრობის ახალი შემადგენლობისგან არასაპარლამენტო ოპოზიციის წარმომადგენლები სიახლეს არ ელოდებიან. საპარლამენტო უცირესობაში აცხადებენ, რომ ცვლილებებს მხარს არ დაუჭერენ.
ნაციონალურ მოძრაობაში მიაჩნიათ, რომ მმართველ გუნდს საზოგადოება შეცდომაში შეჰყავს. პოლიტიკოსები ამ შემთხვევაშიც აქცენტს ბიძინა ივანიშვილზე და მის არაფორმალურ მმართველობაზე აკეთებენ და ამბობენ, რომ ამ გადაწყვეტილებით ქართულმა ოცნებამ დაადასტურა, რომ რესურსი ამოწურა.
" კვირიკაშვილი ამ გუნდის ეკონომიკის მინისტრი იყო და მისი გაპრემიერება მოტყუების მცდელობაა. რადგან სწორედ კვირიკაშვილის ეკონომიკის მინისტრად მუშაობის პერიოდში გაუფასურდა ეროვნული ვალუტა. პირველი დღიდან ასე ატყუებს ქართული ოცნება მოსახლეობას,"- აცხადებს დეპუტატი დავით ბაქრაძე.
,,თავისუფალი დემოკრატები'' აცხადებენ, რომ ცვლილებები მთავრობაში საჭიროა, თუმცა განახლებული მინისტრთა კაბინეტი ამის შესაძლებლობას არ იძლევა.
"ეს პრობლემები, რაც გვაქვს ქვეყანაში, დარჩება, ან უფრო დამძიმდება. ეს ცვლილება არა მიზეზებიდან გამომდინარეობს, არამედ ერთი ადამიანის გადაწყვეტილებაა," – აცხადებს ირაკლი ალასანია.