პარლამენტის თავმჯდომარემ დავით უსუფაშვილმა საქართველოში სამუშაო ვიზიტით მყოფი ევროპის საბჭოს ადგილობრივი და რეგიონული ხელისუფლებათა კონგრესის პრეზიდენტი ჟან-კლოდ ფრეკონი მიიღო.
შეხვედრაზე მხარეებმა დეცენტრალიზაციის და თვითმმართველობის რეფორმის საკითხებზე ისაუბრეს.
"საქართველომ დაიწყო რეალური დეცენტრალიზაცია, რომელსაც ფინანსური და ეკონომიკური საფუძვლების შექმნაც მოყვება. ქვეყანას უკვე 71 არჩეული მერი და მუნიციპალიტეტის ხელმძღვანელი ჰყავს, მაშინ როცა არჩეული მერი მხოლოდ დედაქალაქს მართავდა. '' – განაცხადა უსუფაშვილმა. მან ხაზი გაუსვა ადგილობრივ და რეგიონული ხელისუფლებათა კონგრესთან თანამშრომლობის მნიშვნელობას საქართველოსთვის.
ჟან-კლოდ ფრეკონის თქმით, ამ დღეებში ქართულ მხარესთან გაფორმდება "ROAD MAP"-ის ხელშეკრულებას, რომელიც მიზნად ისახავს რეგიონული მიმართულებით თანამშრომლობის გააქტიურებას. ეს დოკუმენტი არ არის ვრცელი, რადგან ქვეყანამ კანონმდებლობის დონეზე უმეტესი რეკომენდაცია უკვე მიიღო და მთავრობასთან მჭიდრო თანამშრომლობით განახორციელა კიდეც.
"ჩვენ მზად ვართ, ყველა შესაძლო გზით დავეხმაროთ საქართველოს ამ პროცესების წარმატებულად განხორციელებაში და ასევე ჩვენი წვლილი შევიტანოთ ქვეყნის ერთიანობის შენარჩუნების საქმეშიც . ჩვენ ვგმობთ ყველანაირ ოკუპაციას და ევროპის საბჭოს ყველა ხელმომწერი ქვეყანის საზღვარს პატივი უნდა ეცეს", – განაცხადა კონგრესის პრეზიდენტმა.