საყდრისი-ყაჩაღიანის საბადოსთან დაკავშირებით ხელისუფლების მხრიდან ზეწოლის შესაძლებლობაზე სამოქალაქო სექტორში საუბრობენ.
ახალგაზრდა იურისტთა ასოციაციის შეფასებით, არ არის გამორიცხული, რომ გადაწყვეტილება მის აფეთქებაზე კულტურის სამინისტროს მიღმა მიიღეს. ისინი საეჭვო გარემოებებზეც საუბრობენ და აცხადებენ, რომ კანონი არაერთხელ დაირღვა და სასამართლოს დამოუკიდებლობასაც ეჭვქვეშ აყენებენ.
ხელისუფლების ყველა ინსტანციიდან, მათ შორის მთავრობის ადმინისტრაციიდან მომდინარე ზეწოლაზე კულტურის მინისტრის ყოფილი მოადგილეც საუბრობს.
„ყველა ინსტანციიდან მოდიოდა ზეწოლა, თუნდაც სხვა სამინისტროებიდან, მინისტრთა კაბინეტიდან, პრემიერმინისტრის აპარატიდან თუ კანცელარიიდან,“- განაცხადა მარინე მიზანდარიმ.
საყდრისის გადარჩენის კომიტეტის წევრები კი იმ პირთა დაკითხვას ითხოვენ, ვისაც ზეწოლაში ადანაშაულებს კულტურის ყოფილი მინისტრი. მას შემდეგ რაც კომპანია RMG-Gold-მა სამუშაოების გასაგრძელებლად, საყდრისი-ყაჩაღიანის უძველესი ოქროს მაღარო ააფეთქა, ერთი წელი გავიდა.