თბილისში დღეს ოფიციალურად გაიხსნა აბრეშუმის რკინიგზა – ჩინეთიდან წამოსული პირველი სატრანზიტო მატარებელი შემოვიდა. მატარებელმა გამოიარა ჩინეთი, ყაზახეთი, აზერბაიჯანი და საქართველოს გავლით თურქეთში ჩავა. ეს არის პირველი ტრანზიტული ტვირთი და რეალურად განხორციელებული აბრეშუმის გზის პროექტი.
მთავრობის მეთაური ირაკლი ღარიბაშვილი მატარებელს საქართველოს რკინიგზის გენერალურ დირექტორთან და ჩინეთის ელჩთან ერთად დახვდა.
"აბრეშუმის გზა ეს არის ერთ სარტყელში განლაგებული პარტნიორი ქვეყნების დამატებითი ბიძგი, პოლიტიკური, კულტურული, ეკონომიკური ურთიერთობების გაღრმავებისთვის. – განაცხადა მან. –
მჯერა, რომ ეს პროექტი ჩვენს ქვეყანაში მოიტანს მეტ ინვესტიციას, მეტ სტაბილურობას და მეტ დასაქმებას და კეთილდღეობას ჩვენი მოსახლოებისთვის. მჯერა, რომ აბრეშუმის გზის პროექტის საშუალებით, საქართველო გახდება მულტირეგიონული ცენტრი, რომელიც დააკავშირებს ევროპას, აღმოსავლეთ აზიას, ინდოეთს, ცენტრალურ აზიას და შუა აღმოსავლეთს. სწორედ ასეთი გონივრული პოლიტიკით ჩვენ შეგვიძლია, რომ ჩვენი ქვეყანა გახდეს ძალიან მიმზიდველი ინვესტიციებისთვის და გახდეს მართლაც რეგიონული ჰაბი,"- აგანაცხადა ირაკლი ღარიბაშვილმა.