რუსთავი 2- ის ცნობით, უკრაინაში დაიღუპა ქვეყნის დამოუკიდებლობის დაცვისა და ოკუპირებული ტერიტორიების გათავისუფლებისათვის მებრძოლი ქართველი ვაჟკაცი, უკრაინის მოქალაქე ირაკლი ქუთელია. ეს ატოს ზონაში, დონეცკის აეროპორტის მახლობლად, დასახლება ოპიტნოესთან ქვეითთა საბრძოლო მანქანის ნაღმზე აფეთქების შედეგად მოხდა, , როცა თანამებრძოლებთან ერთად დავალებაზე გადიოდა. მასთან ერთად დაიღუპა კიდევ ორი მებრძოლი ალექს ბოლდირევი და ანდრეი კუპრიანოვი, დაშავებულია – 7.
მომხდარს ადასტურებს უკრაინაში საქართველოს საგანგებო და სრულუფლებიანი ელჩი.
უკრაინის საინფორმაციო წყაროებსა და სოციალურ ქსელებში პატრიოტების მიერ გავრცელებულ ინფორმაციაში ნათქვამია, რომ ირაკლი ქუთელია ქვეითთა საბრძოლო მანქანის მძღოლი იყო, რამდენიმე თვის წინ ჩაირიცხა 93-ე ბრიგადაში და მაშინვე გაითქვა სახელი, როცა ბრძოლის ველზე მწყობრიდან გამოიყვანა და ატოს ძალების დისლოკაციის ადგილზე მიიყვანა ოკუპანტების ტანკი.
,,თავდაუზოგავად იბრძოდა და მამაცურად მიდიოდა ნებისმიერ საბრძოლო დავალებაზე, მაგრამ თავის საბრძოლო დამსახურებათა რეკლამირება არ უყვარდა, ამ ვიდეოშიც ი ვერაფრით ვაიძულეთ სახე კარგად გამოეჩინა '' – წერენ მისი მეგობრები, რომლებიც სოციალურ ქსელში აქვეყნებენ ვიდეოჩანაწერს, რომელშიც ირაკლი თანამებრძოლებთან ერთად არის აღბეჭდილი. – ასეთი იყო ის, განუმეორებელი" .
თანამებრძოლებისავე ცნობით, ირაკლიმ ვერ მოასწრო ოჯახის შექმნა, არა ჰყავს არც დედა, არც მამა, უკრაინაში, ბავშვთა სახლში გაიზარდა. და თუ ვინმე ფიქრობდა, რომ მას პატრონი არ ჰყავდა, მისი ჭირისუფალი ახლა უკრაინა და საქართველოა