ავტოსაგზაო შემთხვევა მოხდა დღეს საღამოს ზუგდიდში, თავისუფლების (ყოფილი მახარაძის) ქუჩაზე, მე -6 საჯარო სკოლის წინ. არსებული ინფორმაციით, დიდი სიჩქარით მოძრავი, ერთ-ერთი სადისტიბუციო კომპანიის კუთვნილი ფორდის ტიპის მიკროავტობუსი საპირისპირო მხარეს მომავალ ოპელის მარკის მსუბუქ ავტომანქანას დაეჯახა. შემთხვევის ადგილზე მობილიზებული იყო საპატრულო და სამაშველო სამსახურის ბრიგადები. მიკროავტობუსში მყოფი ორი დაშავებული სასწრაფო-სამედიცინო დახმარების ბრიგადის თანამშრომლებმა ზუგდიდის რეფერალურ საავადმყოფოში გადაიყვანეს. რაც შეეხება მსუბუქი ავტომანქანის მძღოლს, მას სახის მცირედი დაზიანებები აღენიშნებოდა. რაც შეეხება მიკროავტობუსში მყოფი პირების მდგომარეობას – ზუგდიდის რეფერალური საავადმყოფოს მორიგე ექიმის განცხადებით, მათ სხეულის სხვადასხვა სახის დაზიანებები აღენიშნებათ, მათ შორის სახის ძვლის მოტეხილობები. ისინი მკურნალობის პროცესს ამ წუთებშიც გადიან. აღნიშნულ შემთხვევასთან დაკავშირებით აღძრულია თუ არა საქმე და თუ მიმდინარეობს გამოძიება, ჯერჯერობით უცნობია.