თბილისში "აღმოსავლეთ პარტნიორობის" არაფორმალური დიალოგის მეექვსე შეხვედრა მიმდინარეობს. შეხვედრას ესწრებიან ევროკომისარი სამეზობლო პოლიტიკისა და გაფართოების მოლაპარაკებების საკითხებში იოჰანეს ჰანი, ევროკომისარი ჯანდაცვისა და სურსათის უვნებლობის საკითხებსი ვიტენის ანდრიუკაიტისი, ევროკავშირის სხვა წარმომადგენლები და "აღმოსავლეთ პარტნიორობის" ჯანდაცვის სამინისტროების მაღალი დონის დელეგაცია.
შეხვედრაზე საგარეო პოლიტიკური კომპონენტის გარდა, აქცენტი კეთდება ჯანდაცვის საკითხები სექტორული დიალოგის ფორმატში . კერძოდ, განიხილება ჯანდაცვის უსაფრთხოებასთან დაკავშირებული შემდეგი საკითხები: ჯანდაცვის მსოფლიო ორგანიზაციის ჯანმრთელობის საერთაშორისო რეგულაციები, ანტიმიკრობულ რეზისტენტობასთან ბრძოლა და იმუნიზაციის გაგრძელება.
დაგეგმილია სამუშაო სადილი, სადაც განიხილავენ თამბაქოს ჩარჩო-კონვენციის იმპლემენტაციისა და თამბაქოს პროდუქტების უკანონო ვაჭრობის აკრძალვის დამატებით ოქმთან დაკავშირებულ საკითხებს. სპეციალურად ამ ღონისძიებისთვის საქართველოში ჩამოსულია ჯანდაცვის მსოფლიო ორგანიზაციის თამბაქოს ჩარჩო-კონვენციის სამდივნოს ხელმძღვანელი ვერა ლუიზა და კოსტა ე სილვა.
ასევე დაგეგმილია ჯანდაცვის მინისტრ დავით სერგეენკოსა და სოფლის მეურნეობის მინისტრ ოთარ დანელიას ორმხრივი შეხვედრები ევროკავშირისა და "აღმოსავლეთ პარტნიორობის" მონაწილე ქვეყნების წარმომადგენლებთან.
ევროკავშირის ინიციატივით მინისტრთა შეხვედრები პარტნიორ ქვეყნებში 2013 წლიდან ტარდება და ითვალისწინებს ზოგად და სექტორულ შეხვედრებს
შეხვედრა ჟურნალისტებისთვის დახურულია, თუმცა ღონისძიების ბოლოს შედგება პრესკონფერენცია და ამასთან განცხადება მედიისათვის გაკეთდა შეხვედრის დაწყების წინაც. განმარტებები გააკეთა ჯანდაცვის მინისტრმა დავით სერგეენკომ. მისი თქმით, ერთერთი მთავარი თემა იქნება , თუ როგორ სრულდება საქართველოში საერთაშორისო რეგულაციები და ჯანდაცვის მიმართულების სხვადასხვა საკითხები„ შეხვედრის მთავარი ამოცანაა, რომ ის გამოცდილება, რაც აქვთ რეგიონის ქვეყნებს საზოგადოებრივ ჯანდაცვაში, ის გამოწვევები, რაც ყველა ქვეყნისთვის ერთიანია, ერთმანეთს გავუზიაროთ. არსებობს ასეთი დოკუმენტი, რომელიც მიღებულია 2005 წელს, რომლის სახელწოდებაა – ჯანდაცვის საერთაშორისო რეგულაციები, შინაარსობრივად ეს მოიცავს იმ სტრატეგიულ მიმართულებებს, რომლებზეც უნდა იმუშაოს ყველა ქვეყანამ,“ – აღნიშნა დავით სერგეენკომ.