შს სამინისტროს ვაკე-საბურთალოს სამმართველოს მე-5 განყოფილების უფროსი ლაშა კვირკველია დაკავებულია, მას ბრალი ედება სამსახურებრივი უფლებამოსილების გადამეტებასა და ადვოკატ გიორგი მდინარაძის მიმართ განხორციელებული ძალადობაში
ამ ეტაპზე გამოძიება გრძელდება თბილისის პროკურატურის საგამოძიებო ნაწილში. პროკურატურის მიერ გამოქვეყნებულ განცხადებაში ნათქვამია, რომ გამოძიების ფარგლებში უკვე დაკითხულია 18 მოწმე, მოხდა შემთხვევის ადგილის დათვალიერება, ჩატარდა საგამოძიებო ექსპერიმენტი პოლიციის განყოფილებაში გიორგი მდინარაძის მონაწილეობით. დანიშნულია სასამართლო-სამედიცინო, ქიმიური, ბილოგიური, ტრასოლოგიური, გენეტიკური და კომპიუტერული ექსპერტიზები.
ბრალის დამტკიცების შემთხვევაში პოლიციის ყოფილ უფროსს ემუქრება თავისუფლების აღკვეთა 5-დან 8 წლამდე ვადით.
შეგახსენებთ, ადვოკატ გიორგი მდინარაძის განცხადებით, პოლიციაში სამსახურებრივი მოვალეობის შესასრულებლად მისულს, ხელბორკილები დაადეს და ისე სცემეს.
"მე შევედი მათთან და ვუთხარი, რომ ჩემმა კლიენტმა, არასრულწლოვანმა დუმილი აირჩია. ამის შემდეგ წავდით გამომძიებელთან დაკითხვის დასაწყებად. ამასობაში ეს პირი მოვიდა და დამიწყო თავის დარტყმა და უნდოდა პროვოკაციაზე წავსულიყავი. მე კარგად ვიცნობ პოლიციელებს და თავი მაქსიმალურად შევიკავე, რადგან შესაძლოა სისხლის სამართლის საქმე აღძრულიყო ჩემს წინააღმდეგ. ჩემი მხრიდან არ ყოფილა სიტყვიერი შეურაცხყოფაც კი. მიუხედავად ჩემი მოწოდებისა დაწყნარებულიყო, მან ხელი დამარტყა. შემდეგ გასცა ბრძანება ჩემი დაკავების და ხელბორკილები დამადეს. მცემდნენ ხან თავით, ხან მირტყამდნენ ხელს მხოლოდ მარჯვენა მხრიდან", – განაცხადა გიორგი მდინარაძემ.