ზუგდიდის მუნიციპალიტეტის სოფელ განმუხურში დღეს ჩახაიების ოჯახში სახლი ჩამოინგრა. ოჯახი სადაც 11 სული, აქედან 5 მცირეწლოვანი ბავშვი ცხოვრობს პრაქტიკულად უსახლკაროდ დარჩა. სახლი, რომელიც ათეულ წლებს ითვლის, საცხოვრებლად უვარგისია. ჩამონგრევის შედეგად სახლი მთლიანად მოწყდა საძირკველს, დაზიანდა სახურავი, შენობის კედლები. ოჯახის წევრები აცხადებენ, რომ რამდენჯერმე მიმართეს ადგილობრივ ხელისუფლებას, მათ შორის სოფლის ადმინისტრაციული ერთეულის წარმომადგენელს, თუმცა დახმარებაზე უარი მიიღეს. სახლის ჩამონგრევის შედეგად ოჯახი პრაქტიკულად ღია ცის ქვეშ რჩება, ისინი ყურადღებას და დახმარებას ითხოვენ.

ჩახაიების მრავალსულიანი ოჯახი სოციალურად დაუცველთა კატეგორიას მიეკუთვნებიან. 11 სულიან ოჯახში არც ერთი წევრი არ მუშაობს. 5 მცირეწლოვანი ბავშვიდან ერთ-ერთი მძიმედაა დაავადებული და ამჟამად თბილისში მკურნალობს. მძიმე სოციალურ პირობებში მცხოვრებ ოჯახის წევრებს მეზობლებიც ეხმარებიან.

აღნიშნულთან დაკავშირებით ტელეკომპანია "ოდიში" ზუგდიდის მუნიციპალიტეტის გამგეობას დაუკავშირდა. გამგებლის მოადგილის გურგენ სართანიას განცხადებით, აღნიშნული შემთხვევა მათთვის ცნობილია და დაზარალებული ოჯახის დასახმარებლად მზად არიან.

დაზარალებული ოჯახი აცხადებს, რომ თუ არ მოხდა დროული რეაგირება, მათ ზამთარში, მცირეწლოვან ბავშვებთან ერთად სიცივეში სახლის გარეშე მოუწევთ ყოფნა.