მასწავლებელთა პროფესიული განვითარების ეროვნულმა ცენტრმა სასკოლო ქსელში ჩართული მასწავლებლებისთვის რიგით მეორე ტრეინინგი დაიწყო.
ტრეინინგი ერთი თვის განმავლობაში გასტანს და მოიცავს ეფექტური სასწავლო გარემოს, ორგანიზაციული კულტურის, პროფესიული ქცევისა და ეთიკის საკითხებს , ასევე მათ კავშირს მასწავლებლის საქმიანობის დაწყების, პროფესიული განვითარებისა და კარიერული წინსვლის სქემასთან.
ცენტრის ინფორმაციით, აღნიშნული ტრეინინგი მასწავლებლებს თვითშეფასების კითხვარის შევსებაში და მისი თითეული კომპონენტის გააზრებაში დაეხმარება.
"სასკოლო ქსელების პროგრამა მიმდინარე წელს ამოქმედდა და მასში 353 სკოლისგან შექმნილი 90 სასკოლო ქსელია გაერთიანებული. თითოეულ ქსელში, ტერიტორიული პრინციპით, ხუთამდე საჯარო სკოლაა გაერთიანებული და თითეული სკოლის 5 წარმომადგენელი: სკოლის დირექტორი, დირექტორის მოადგილე და 3 სხვადასხვა საგნის მასწავლებელი.
პროგრამა, რომლის ფარგლებში ტარდება ტრენინგი, მიზნად ისახავს სკოლების მიერ საჭიროებების დადგენას, მასწავლებელთა პროფესიულ განვითარებისა და სკოლებში სწავლა-სწავლების ხარისხის ამაღლების ხელშეწყობას ურთიერთთანამშრომლობისა და გამოცდილების გაზიარების გზით .