ამ დროისათვის მინიმუმ ხუთი ბავშვის ცხედარია ნაპოვნი სინას ნახევარკუნძულის მთებში რუსული სამოქალაქო თვითმფრინავის კატასტროფის ადგილზე. – ცნობას ამის შესახებ სააგენტო რეიტერი  ავრცელებს თვითმფრინავის ჩამოვარდნის ადგილზე მომუშავე ადგილობრივ სამაშველო სამსახურებზე დაყრდნობით.  როგორც სააგენტოს წყარო იუწყება, თვითმფრინავის კორპუსი ორად არის გახლეჩილი და ორივე ნაწილიდან მხოლოდ ძლიერ დანაწევრებული ნამსხვრევებია დარჩენილი. მაშველებმა მცირე ხნის წინათ ნამსხვევების გროვებიდან რამდენიმე ადამიანის  განწირულ ხმებსაც მოკრეს ყური და ახლა ცდილობენ, როგორმე მიაღწიონ თვითმფრინავის იმ სექტორამდე, სადაც ცოცხლად გადარჩენილთა პოვნას იმედოვნებენ.

შეგახსენებთ, დღეს დილით კიპროსის რაიონში რადარებიდან გაქრა რუსეთის სამოქალაქო ლაინერი Airbus A321  . ეს მოხდა ეგვიპტის აეროპორტიდან მისი აფრენის  23-ე წუთზე. კიპროსის მხარემ ნახევარი საათის განმავლობაში ვერ შეძლო  ზუსტად დაედგინა საიდან მოდიოდა და საით მიემართებოდა გამქრალი თვითმფრინავი, პასუხი ამ კითხვებს მხოლოდ ეგვიპტის აეროპორტის მიერ ატეხილი განგაშის შემდეგ გაეცა. როგორც გაირკვა, თვითმფრინავი, რომელიც ავიაკომპანია ,,კოგალიმავიას’' ეკუთვნოდა,  ასრულებდა რეისს  9268 და შარმ-ეშ-შეიხიდან   სანქტ-პეტერბურგში მიფრინავდა. თვითმფრინავის ბორტზე იმყოფებოდა  217 მგზავრი, ძირითადად რუსი ტურისტები, და ეკიპაჟი 7 კაცის შემადგენლობით. თვითმფრინავი სინას ნახევარკუნძულის შუაგულში, მთებში  ჩამოვარდა, ელ – ქანთალასა და ელ ლაქსიმის რაიონებს შორის, ქალაქ ელ-ხასნას სიახლოვეს. ადგილზე მისულ მაშველებს თვითმფრინავი ერთიანად დამსხვრეული დახვდათ. ამ დროისათვის ნაპოვნი ცხედრები უახლოეს საავადმყოფოებშია გადასვენებული.