მსოფლიო ბანკის 2016 წლის მონაცემებით ბიზნესის კეთების კუთხით საერთაშორისო რეიტინგში საქართველო 9 პოზიციით ჩამოქვეითდა და 24-ე ადგილზე გადაინაცვლა.
შარშანდელი რეიტინგით ქვეყანა მე-15 ადგილზე იყო. ბიზნეს რეფორმების კუთხით 2014- 2015 წლებში მსოფლიო ბანკი ორ ძირითად მიმართულებას გამოყოფს: ეს არის მშენებლობის ნებართვების გაცემის გამარტივება და კონტრაქტების გაფორმების პროცესში ელექტრონული სისტემის დანერგვა, რომელიც ადვოკატებს საშუალებას აძლევს ელექტრონულად დაადასტურონ მოთხოვნები.
ანგარიშში წერია, რომ საქართველოს კიდევ აქვს სამუშაო, განსაკუთრებით მცირე სააქციო წილის მქონე ინვესტორების დაცვის კუთხით. საერთო ჯამში კი მსოფლიო ბანკი აღნიშნავს, რომ ქვეყანა ბოლო 12 წლის განმავლობაში ბიზნესის კეთების კუთხით მნიშვნელოვნად განვითარდა.