ზუგდიდის მეორე საჯარო სკოლის წინ, დადიანების სასახლის მიმდებარედ არსებული მიწის ნაკვეთი, რომელიც ქალაქ ზუგდიდის მერიამ აუქციონზე გასაყიდად გაიტანა, არ გაიყიდა. ქალაქის მერიაში აცხადებენ, რომ აუქციონზე ბიჯი არ დაფიქსირდა, რის გამოც უძრავი ქონება არ გაიყიდა. ელექტრონული აუქციონი გუშინ საღამოს 16 საათზე დასრულდა.
აუქციონის პირობის თანახმად, მყიდველი ვალდებული იყო აღნიშნულ ტერიტორიაზე საერთაშორისო ბრენდის სახელის მქონე სასტუმრო აეშენებინა, რომელსაც უნდა ჰქონოდა არანაკლებ 120 ნომერი. ამასთან, სასტუმრო დადიანების სასახლის იერსახის შესაბამისი უნდა ყოფილიყო. ინვესტორი აღნიშნული პროექტის განსახორციელებლად 20 მილიონ დოლარს დახარჯავდა.
ქალაქ ზუგდიდის მეერიამ სასტუმროს ასაშენებლად მეორე საჯარო სკოლის წინ მდებარე 12 101 კვ/მ არასასოფლო-სამეურნეო დანიშნულების მიწის ნაკვეთი გაიტანა აუქციონზე გასაყიდად. აღნიშნულ გადაწყვეტილბას საზოგადოების მხრიდან უარყოფითი გამოხმაურება მოჰყვა. ისინი ამბობენ, რომ დაუშვებელია დადიანების სასახლის წინ სასტუმროს აშენება, რადგან ის კულტურულ მემკვიდრეობას დაამახინჯებს.