გუშინ პრეზიდენტთან შეხვედრაზე მივიდა საქართველოს პარლამენტის თავმჯდომარე დავით უსუფაშვილი მივიდა. საუბრის თემა იყო საქართველოში შექმნილი სიტუაცია, რომელშიც პრეზიდენტი კონსტიტუციური წესრიგის დარღვევის საფრთხეებს ხედავს. შეხვედრაზე ითქვა,რომ ყველა პოლიტიკურმა მხარემ, ყველა საჯარო მოხელემ, ყველა ადამიანმა, ვინც მედიის მეშვეობით საზოგადოებასთან კომუნიკაციაშია, ხელი უნდა შეუწყოს ვითარების განმუხტვას, სამოქალაქო თანხმობას, დაძაბულობის მოხსნას და არა პირიქით, რაიმეს ესკალაციას.
შეხვედრის შემდეგ დავით უსუფაშვილმა ჟურნალისტებთან საუბარში კიდევ ერთხელ ახსნა ის, თუ რატომ იკავებდა თავს აქამდე პრეზიდენტის მიწვევის მიღებისაგან და აღნიშნა, რომ არც გასულ დღეებში და არც ახლა ვერ ხედავს საქართველოში რაიმე განსაკუთრებულ და საგანგებო მდგომარეობას: "ვერ ვხედავ კონსტიტუციური წესრიგის დარღვევის რაიმე საფრთხეებს. ვხედავ ცალკეულ კონკრეტულ პრობლემებს, საჭიროა პრობლემებთან გამკლავება, რომ ზოგადად და მომავალშიც ოდესმე თეორიული საფრთხეც კი ავიცილოთ თავიდან. ამიტომ ყველამ ჩვენი საქმე უნდა ვაკეთოთ გულმოდგინედ და თუ რაიმე მოსაზრება გვაქვს, ერთმანეთს გავუზიაროთ", – განაცხადა უსუფაშვილმა.
"ჩვენ იმიტომ ვართ არჩეულები თუ დანიშნულები, რომ ეს გავაკეთოთ, თორემ აღშფოთება ადამიანებს შეუძლიათ სახლში, სამზარეულოშიც, არ სჭირდება ამას რაიმე დიდი მონდომება. ჩვენი ამოცანაა შერიგება, თანხმობა, პრობლემების მოგვარება, იმ შემთხვევაშიც კი, როდესაც არ ვეთანხმებით ერთმანეთს, ეს როგორმე გადავიყვანოთ არგუმენტების კონკურენციის და არა – პიროვნული მტრობის რეჟიმში. ეს არის ჩვენი საერთო ამოცანა და პრეზიდენტთანაც ამაზე გვქონდა საუბარი", – განაცხადა დავით უსუფაშვილმა.