თბილისის საქალაქო სასამართლოსთან "რუსთავი 2"-ის მხარდამჭერთა რიცხვი მატულობს, აქ იმყოფებიან ტელეკომპანიის ჟურნალისტები, თანამშრომლები, ასევე სხვადასხვა არასამთავრობო ორგანიზაციების წარმომადგენლები, ცნობადი სახეები და მოქალაქეები, რომლებიც მხარდაჭერას უცხადებენ "რუსთავი-2"-ს.
პროცესი ხმაურიან ვითარებაში დაიწყო – მოსამართლის გადაწყვეტილებით, სასამართლო დარბაზში არ დაუშვეს ტელეკომპანის გენერალური დირექტორი ნიკა გვარამია. ამის მიზეზად მოსამართლე თამაზ ურთმელიძემ დაასახელა ის, რომ წინა პროცესზე გვარამიამ შეურაცხყოფა მიაყენა სასამართლოს. ამასთან, მისი თქმით, გვარამიას შოუს ელემენტები შეაქვს პროცესზე.
პროცესის დაწყების წინ მოსამართლე თამაზ ურთმელიძემ ტელეკომპანია "რუსთავი 2"-ს სასამართლო სხდომის ოფისში სიგნალის მეშვეობით ჩაწერის უფლება არ მისცა. ამის შესახებ მან განაცხადა ტელეკომპანიის მიერ სასამართლოში წარდგენილი განცხადების პასუხად, რომელშიც იგი ითხოვდა პროცესის სპეციალური სიგნალით ჩაწერის უფლებას, იმ პირობის დაცვით, რომ პროცესის არ იქნება ტრანსლირებული პირდაპირ ეთერში. ურთმელიძის თქმით, ამ უფლებას ვერ მისცემს ტელეკომპანიის ოპერატორს, რადგან წინა სხდომაზე დაუშვა ეს უფლება და მოხდა პროცესის პირდაპირ ეთერში ტრანსლირება.
მოსამართლეს ტელეკომპანიის ჟურნალისტმა, ნათია ტრაპაიძემ უთხრა, რომ პირდაპირი ტრანსლირება არ მომხდარა და ეთერში გავიდა ჩანაწერი, რომელიც დამონტაჟდა.
თამაზ ურთმელიძემ მას განუმარტა, რომ არ მიუცია მისთვის პოზიციის დაფიქსირების უფლება და მოსამართლის განჩინების ზემდგომ ინსტანციაში გასაჩივრება შეუძლიათ.
ასევე, თამაზ ურთმელიძე ტელეკომპანიის ოპერატორს დაპირდა, რომ პროცესის ჩაწერისას მეხსიერების ბარათის და კვების წყაროს შეცვლაში მანდატურის სამსახური დაეხმარება.