თბილისის საქალაქო სასამართლოსთან რუსთავი 2-ის მხარდამჭერი აქცია მიმდინარეობს.პარალელურად, მოსამართლე თამაზ ურთმელიძე რუსთავი 2-ის წინააღმდეგ ქიბარ ხალვაშის სარჩელს განიხილავს. სხდომაზე რუსთავი 2-ის ადვოკატებმა მოსამართლის აცილება მოითხოვეს, თუმცა, ურთმელიძემ ეს შუამდგომლობა არ დააკმაყოფილა.

მას შემდეგ, რაც მოსამართლემ გააკეტა განცხადება, რომ არ აპირებს საქმის განხილვის თავიდან აცილებას, რუსთავი 2-ის იურისტებმა მოითხოვეს, მოსამართლის აცილების შუამდგომლობის წარსადგენად აუდიო-ვიზუალური საშუალებების გამოყენება, მოსამართლემ ეს მოთხოვნა დააკმაყოფილა და სხომაზე ტექნიკური სამუშაოების განსახორციელებლად რამდენიმე წუთით შესვენება გამოცხადდა. მასალაში წარმოდგენილი იქნება რუსთავი ორის და მისი გენერალური დირექტორის მისამართით მოსამართლე თამაზ ურთმელიძის მეუღლის მიერ ფეისბუკში გაკეთებული განცხადებები. ამასთანავე ხელისუფლების წარმომადგენლების საჯარო განცხადებები. დაცვის მხარის განცხადებით მოსამართლე ზეწოლას განიცდის პროკურატურის მხრიდან.

შეგახსენებთ, ტელეკომპანია "რუსთავი 2"-მა რამდენიმე დღის წინ გაავრცელა ინფორმაცია იმის თაობაზე, რომ სიძეზე ნაჯახით განხორციელებული თავდასხმის გამო პროკურატურა მოსამართლე თამაზ ურთმელიძის დედის სისხლის სამართლის პასუხისგებაში მიცემას აპირებდა. ტელეკომპანიის ცნობით, ამით პროკურატურა ახორციელებს ზეწოლას მოსამართლეზე. პროკურატურამ ზეწოლა უარყო, მაგრამ მართლაც წაუყენა ბრალი მოსამართლის დედას ზემოთ აღნიშნულ ფაქტზე.