როგორ მოქმედებენ ანტიდასავლური პროპაგანდის გამტარებელი ონლაინ მედია საშუალებები და ახდენს თუ არა ეს გავლენას საზოგადოებრივი აზრის ფორმირებაზე? ამ საკითხზე საერთაშორისო გამჭვირვალობა – საქართველო დღეს ანგარიშს გამოაქვეყნებს.
კვლევა ბოლო წლებში მომრავლებულ ინტერნეტტელევიზიებსა და საინფორმაციო სააგენტოებში გავრცელებულ ანტიდასავლური ხასიათის ინფორმაციას ეხება. არასამთავრობო ორგანიზაციაში აცხადებენ, რომ ეს პროცესი უნდა კონტროლდებოდეს და მოუწოდებენ მედიასაშუალებებს გამოაქვეყნონ ინფორმაცია მფლობელების შესახებ.
"საზოგადებამ უნდა იცოდეს თუ ვინ ფლობს ონლაინ მედიას, განსაკუთრებით ბოლო წლებში მომრავლებულ ონლაინ საშუალებებს, ეს იქნება ინტერნეტტელევიზიები თუ საინფორმაციო ვებ გვერდები, რომლებიც აშკარად გამოხატავენ ანტი დასავლურ განწყობებს, ეწევიან ანტი დასავლურ პროპაგანდას. მოვუწოდებთ, რომ მათი ანგარიშვალდებულება საზოგადოების მიმართ გაზარდონ, რაც გამოიხატება იმაში, რომ წარმოადგინო მათი დაფინანსების წყაროების და მფლობელების შესახებ ინფორმაცია," – აცხადებს საერთაშორისო გამჭვირვალობა – საქართველოს პროექტების კოორდინატორი ნინო რობაქიძე.
მედიაექსპერტები სახელმწიფოს ვალდებულებაზეც საუბრობენ. მედიის განვითარების ფონდის გამგეობის თავმჯდომარის განმარტებით, სახელმწიფო ვალდებულია, არ გაუფორმოს ხელშეკრულებები ისეთ მედიებს, ვინც აღვივებს სიძულვილს.
"მარგინალური მედიები არსებობენ ყველა ქვეყანაში, მაგრამ ჩვენს შემთხვევაში პრობლემაა ის, როდესაც ხელისუფლება ახდენს ასეთი მედიების ლეგიტიმაციას და მეორეს მხრივ, ებრძვის იმ მედიასაშუალებს, ვისაც ღიად დეკლარირებული პრო დასავლური კურსი აქვთ," – განაცხადა თამარ კინწურაშვილმა.