ზუგდიდში “ერთიანი ნაციონალური მოძრაობის” ქალთა ორგანიზაციის ორგანიზებით სამაუწყებლო კომპანია რუსთავი 2 -ის მხარდასაჭერი აქცია გაიმართა. აქციის მონაწილეებს ხელში ეჭირათ პლაკატები წარწერით – „არ დავუშვებთ არხის გაჩერებას“, „ხელები შორს რუსთავი 2 -სგან“, „ინფორმაცია ცენზურის გარეშე“. შეკრებილებმა ხელისუფლებას მოუწოდეს არ შეუშალონ ხელი ტელეკომპანიას მუშაობაში. ისინი ამბობენ, რომ რუსთავი 2 -ის დახურვით საქართველოში განსხვავებული ინფორმაციის მიღების საშუალება შეიზღუდება. ზუგდიდის პარალელურად საქართველოს თითქმის ყველა ქალაქში სამაუწყებლო კომპანია „რუსთავი 2 -ის“ მხარდასაჭერი აქცია გაიმართა, რომელშიც მონაწილეობა მხოლოდ ქალებმა მიიღეს. დღევანდელი აქციის მონაწილეების განცხადებით, თუ ხვალ, 19 ოქტომბერს სასამართლო ტელეკომპანიის საწინააღმდეგო გადაწყვეტილებას მიიღებს, ისინი პერმანენტული აქციის გამართვასაც არ გამორიცხავენ რუსთავი 2 -ის დასაცავად.