ეკონომიკისა და მდგრადი განვითარების მინისტრის დიმიტრი ქუმსიშვილის განცხადებით, ანაკლიის პორტის უკან 600 ჰექტარზე თავისუფალი ინდუსტრიული ზონა მოეწყობა.
როგორც მინისტრმა აღნიშნა, "აბრეშუმის გზის ფორუმზე" ერთერთი მთავარი თემა იყო ქვეყნის სატრანზიტო პოტენციალი და შესაძლებლობები, რომელიც ტრანზიტმა უნდა მოიტანოს. „ძალიან მნიშვნელოვან ინვესტიციებს ველოდებით, პირველ რიგში ინფრასტრუქტურის მიმართულებით. ახლა ვართ ანაკლიის ღრმაწყლოვანი პორტის გამარჯვებულის გამოვლინების საბოლოო ეტაპზე. ეს პორტი არის ზუსტად ის შემადგენელი ნაწილი აბრეშუმის გზისა, რომელმაც ჩვენს ქვეყანას კიდევ უფრო დამატებითი და მნიშვნელოვანი როლი უნდა შესძინოს აბრეშუმის გზის განვითარებაში". ანაკლიის ღრმაწყლოვანი პორტი ჯამურად რამდენიმე მილიარდი ინვესტიციაა.
პორტის უკან, 600 ჰექტარზე გაკეთდება თავისუფალი ინდუსტრიული ზონა, რომელიც ასევე შექმნის დამატებით სამუშაო ადგილებს. ჩვენ გვაქვს ძალიან კარგი კანონი თავისუფალი ინდუსტრიული ზონის შესახებ. მას სჭირდება დახვეწა, თუმცა დღეს ეს კანონი არის, რომელიც იძლევა შესაძლებლობას, რომ საქართველოში აწარმოოს პროდუქცია და შემდეგ შეიტანოს ევროპაში", – განაცხადა დიმიტრი ქუმსიშვილმა.