8 რელიგიურმა ორგანიზაციამ საქართველოს საკონსტიტუციო სასამართლოს მიმართა სარჩელით და იმ ნორმების არაკონსტიტუციურად ცნობა მოითხოვა, რაც რელიგიურ უმცირესობებს საგადასახადო სფეროში უთნასწორო და დისკრიმინაციულ მდგომარეობაში აყენებს.
კერძოდ, საუბარია ნორმებზე, რომლებიც მართლმადიდებელი ეკლესიისგან განსხვავებით, სხვა რელიგიურ გაერთიანებებს დამატებული ღირებულების, მოგებისა და ქონების გადასახადის გადახდას ავალდებულებს. რელიგიური ორგანიზაციების თქმით, ეს წინააღმდეგობაში მოდის საქართველოს კონსტიტუციის მე-14 მუხლით აღიარებულ თანასწორობის პრინციპთან.
სარჩელს ხელს აწერენ რელიგიური ორგანიზაციები: ლათინ კათოლიკეთა კავკასიის სამოციქულო ადმინისტრაცია, საქართველოს ევანგელურ-ბაპტისტური ეკლესია, ქართველ მუსლიმთა კავშირი, საქართველოს სახარების რწმენის ეკლესია, მეშვიდე დღის ქრისტიან-ადვენტისტთა ეკლესიის ტრანსკავკასიური იუნიონი, საქართველოს სიცოცხლის სიტყვის ეკლესია, წმიდა სამების ეკლესია, ქრისტეს ეკლესია.
საკონსტიტუციო სასამართლოში რელიგიურ ორგანიზაციებს თბილისის თავისუფალი უნივერსიტეტი და ტოლერანტობისა და მრავალფეროვნების ინსტიტუტი (TDI) წარმოადგენენ.