ტელეკომპანია “რუსთავი 2-ის” გარშემო არსებულ სამართლებრივ დავაში შესაძლოა  ირაკლი ოქრუაშვილიც ჩაერთოს. სამაუწყებლო კომპანიის ხელმძღვანელობის ინფორმაციით, არ არის გამორიცხული თავდაცვის ყოფილმა მინისტრმა მასსა და ქიბარ ხალვაშს შორის 2004 წელს გაფორმებული დოკუმენტი გაასაჯარავოს, რომელშიც სავარაუდოდ საუბარია იმის შესახებ, რომ ხალვაშმა ოქრუაშვილისგან 7 მილიონ დოლარზე მეტი მიიღო. ირაკლი ოქრუაშვილის პოზიცია ჯერჯერობით უცნობია. ის ჟურნალისტების  სატელეფონო ზარებს არ პასუხობს. “ირაკლი ოქრუაშვილმა 7 მილიონ დოლარზე მეტი თანხა მისცა ქიბარ ხალვაშს, რომ მას შეეძინა წილები წინა მფლობელებისგან. იმ მფლობელებისგან, რომლებიც ამტკიცებენ, რომ ფული არ აუღიათ ამაში. სამაგიეროდ კი ირაკლი ოქრუაშვილს გადასცა მოთხოვნის ყველა უფლება “რუსთავი 2-თან” დაკავშირებით. ეს კიდევ ერთხელ ცხადყოფს იმას, რომ ქიბარ ხალვაშს ფორმალურადაც არავითარი მოთხოვნის უფლება არ გააჩნია და ის არ არის უფლებამოსილი მოსარჩელე. სხვა საკითხია, რომ ზოგადად მოთხოვნის არავითარი სამართლებრივი საფუძველი არ არსებობს და არც მტკიცებულებაა საქმეში,”-აცხადებს სამაუწყებლო კომპანია "რუსთავი2" -ის გენერალური დირექტორი ნიკა გვარამია.