წუხანდელმა ძლიერმა წვიმამ ქობულეთსა და მის მიდამოებში მეწყერი და წყალდიდობა გამოიწვია, ადიდებულმა მდინარე აჭყვმა ქალაქის რიგი უბნები დატბორა. საცხოვრებელ სახლებში წყალი შევარდა, ქუჩებში დაგუბებულ ლაფიან წყალში მანქანებია ჩარჩენილი, გაითიშა ელექტრო ენერგია. მოსახლეობას დატბორილი სახლებიდან გამოსვლაში მთელი ღამე ეხმარებოდნენ ადგილობრივი და გურიიდან, იმერეთიდან და სამეგრელოდან ჩაული მაშველები.
ბათუმი-ქობულეთის მიმართულებით 3 კილომეტრიანი საცობია. ბობოყვათიდან მდინარე კინტრიშის ხიდამდე სატრანსპორტო საშუალებები გადაადგილებას ვერ ახერხებენ. საპატრულო პოლიციის ეკიპაჟებმა გზა მას შემდეგ გადაკეტეს, რაც მდინარე აჭყვა კალაპოტიდან გადმოვიდა და ცენტრალური გზა დატბორა.
ამ ეტაპზე სატრანპორტო საშუალებებით გადაადგილება აკრძალულია ასევე ქობულეთიდან ბათუმის მიმართულებით. სამაშველო სამსახურები და მძიმე ტექნიკა გზებზე ჩარჩენილი ავტომობილების გამოყვანის სამუშაოებს ახორციელებენ. ძლიერმა წვიმამ პრობლემები შექმნა გურიაშიც – ოზურგეთის მოსახლეობის დიდი ნაწილი ელექტროენერგიის გარეშე დარჩა. ენერგოპროჯორჯია დილიდან დაზიანებული სადენებისა და წაქცეული ბოძების აღდგენით სამუშაოებს ატარებს. ქობულეთში ამ წუთებშიც ძლიერად წვიმს, რაც აფერხებს აღდგენით და ამოტუმბვით სამუშაოებს.