რუსთავი 2-ის ირგვლივ განვითარებულ მოვლენებთან დაკავშირებით შეფასებას აკეთებენ არასამთავრობო ორგანიზაციების წარმომადგენლები და მედიაექსპერტები.
„ჩანს, რომ გარკვეული წრეების და მთავრობის დაინტერესება ამ ყველაფერში შესაძლოა არის, რადგან ამ პროცესში ძალიან ბევრი პროცედურა დარღვეულია. შეუძლებელია, დამთხვევა იყოს,“ – აცხადებსსაერთაშორისო გამჭვირვალობა – საქართველოს აღმასრულებელი დირექტორი ეკა გიგაური.
„სამართლიანი არჩევნებისა და დემოკრატიის საერთაშორისო საზოგადოების“ აღმასრულებელი დირექტორის ნინო ლომჯარიას შეფასებით, იმ გარემოებების გათვალისწინებით, რომ ჯერ კიდევ პირველ ყადაღაზეც არ არის გადაწყვეტილება მიღებული და საკმაოდ გაწელილია პროცესები, რჩება იმის შთაბეჭდილება, რომ სასამართლო არ ცდილობს პროცესი წაიყვანოს გამჭვირვალედ.
როგორც მედიაექსპერტი ნათია დანელია აცხადებს, ნებისმიერი ქმედება, რომელსაც ხელისუფლება ახორციელებს რუსთავი 2-ის წინააღმდეგ, კავშირშია პოლიტიკურ ზეწოლასთან და ხელისუფლების მცდელობასთან გააკონტროლოს, ან საერთოდ გააჩუმოს რუსთავი 2.
„იმ ინფორმაციის საფუძველზე, რაც მაქვს, შემიძლია დასკვნა გამოვიტანო – ეს არ არის სამართლებრივი პროცესი, ეს არის პირდაპირი პოლიტიკური დაკვეთა. ეს არის ბიძინა ივანიშვილის კარზე შემდგარი გარიგება და შეთანხმება,“ – აცხადებს ნინო დანელია და იმედს იტოვებს, რომ საზოგადოება დაიცავსრუსთავი 2-ს და „წინ აღუდგება იმ ძალადობას, რომელსაც ხელისუფლება ახორციელებს მედიაზე.“
შეგახსენებთ, თბილისის საქალაქო სასამართლომ შპს ტელეკომპანია საქართველოს წილებიც დააყადაღა. შპს ტელეკომპანია საქართველო ტელეკომპანია რუსთავი 2-ის 51-პროცენტიანი წილის მფლობელია.