ზუგდიდისა და ცაიშის ეპარქიის მიტროპოლიტმა მეუფე გერასიმემ დღეს ივერიის ყოვლადწმინდა ღვთისმშობლის მშენებარე საკათედრო ტაძარში ეპარქიის სამღვდელოებასთან ერთად სამადლობელი პარაკლისი გადაიხადა. მეუფემ წირვის დასასრულს გუშინდელ დღეზე ისაუბრა. „მადლობა ღმერთს, რომ უფალმა ეს დღე მშვიდობიანად დაასრულა. მინდა ავღნიშნო არა ის ფაქტი, რომ დედაღვთისმშობელი ზუგდიდში დარჩა და ამ გადაწყვეტილების მიღება დედამიწის ზურგზე არავის შეუძლია გარდა თავად ღვთისმშობლისა და ყოვლადწმინდა სამებისა, რომელიც ზეცაში წყვეტს იმ საკითხებს, რომელიც უდიდეს სიწმინდეებს ეხება. რათქმაუნდა შეიძლება ადამიანებმა გამოხატონ თავიანთი მოსაზრებები, გამოხატონ თავიანთი შეხედულება, სურვილები, მაგრამ ამ საკითხს წყვეტს ყოვლადწმინდა სამება და თავად დედაღვთისმშობელი“ – განაცხადა მეუფე გერასიმემ წირვის შემდეგ ქადაგებაზე. ზუგდიდისა და ცაიშის მიტროპოლიტმა ასევე ივერიის ყოვლადწმინდა ღვთისმშობლის მშენებარე საკათედრო ტაძარზეც ილაპარაკა და მას თვალსაჩინო ეკლესია უწოდა. „ ეს ტაძარი უნდა გაათბოს თქვენმა ლოცვამ, ეს ტაძარი უნდა გაათბოს და გაიჟღენთოს მამების მიერ ჩატარებული ლოცვებით და ეს ტაძარი შენდება ღვთის და წმინდა ღვთისმშობლის სადიდებლად. მის მშენებლობაში მონაწილეობა ყველამ უნდა მივიღოთ“ – აღნიშნა ქადაგებისას მეუფე გერასიმემ. ასევე, ზუგდიდისა და ცაიშის მიტროპოლიტმა მრევლს ლოცვის გაძლიერებისკენ მოუწოდა.