ევროკავშირის წარმომადგენლობა მიესალმება საკონსტიტუციო სასამართლოს გადაწყვეტილებას გიგი უგულავას საქმესთან დაკავშირებით და " საკვანძოსა და ისტორიულს " უწოდებს მას – აღინიშნა დღეს ევროკავშირის წარმომადგენლობაში გამართულ პრესკონფერენციაზე .
წარმომადგენლობის ხელმძღვანელის მოადგილემ კარლო ნატალემ პრესკონფერენციაზე განაცხადა, რომ ეს იყო ,,საკვანძო, ისტორიული გადაწყვეტილება, რადგან მართლაც არსებობდა სერიოზული კითხვები იმასთან დაკავშირებით, თუ როგორ მიმდინარეობდა ზოგადად ასეთი პროცესები. ის, რომ ეს გადაწყვეტილება მიღებულ იქნა, მიანიშნებს, რომ სასამართლო საქართველოში მიჰყვება სათანადო პრინციპებს. ჩვენ ადრე გვქონდა გარკვეული კითხვები ამასთან დაკავშირებით და ამიტომაც ეს გადაწყვეტილება, ჩემი აზრით, არის დიდი მიღწევა",
მისივე თქმით, საკონსტიტუციო სასამართლოს გადაწყვეტილების აღსრულება საკმაოდ მალე, 24 საათში მოხდა, თუმცა არ ისურვებდა პროცედურულ დეტალებში ჩაღრმავებას, ვინაიდან ნატალეს თქმით, ეს უკვე საქართველოს კანონმდებლობის გადასაჭრელი საკითხია.