საქართველოს თავდაცვის სამინისტრო შეშფოთებას გამოთქვამს გუშინ ღამით, ლაგოდეხის რაიონის სოფელ კაბალში მომხდარი ფაქტის გამო და ამასთან დაკავშირებით გაკეთებულ განცხადებაში ირწმუნება, რომ შესაბამისი უწყებები გამოიძიებენ მომხდარის მიზეზებს და აუცილებლად დადგება კონკრეტული პირების პასუხისმგებლობის საკითხი. თავდაცვის სამინისტრო დაზარალებულის ოჯახს სრულად აუნაზღაურებს სსსტც “დელტას“ მიერ მიყენებულ ზარალს.
შეგახსენებთ, წუხელ „დელტას“ მიერ სეტყვასაშიში ღრუბლების აქტიური დამუშავების პროცესში ერთ-ერთი ჭურვი ადგილობრივი მოსახლის – ასალანოვის ოჯახის კუთვნილ საცხოვრებელ სახლს დაეცა. გაჩენილი ხანძრის შედეგად დამწვარია სახლის სახურავი, გაბზარულია კედლები და დაზიანებულია საყოფაცხოვრებო ნივთები, თუმცა საბედნიეროდ ცეცხლის ჩაქრობა მალევე მოხერხდა და შემთხვევის შედეგად არავინ დაშავებულა.მომხდარ ფაქტზე აღძრულია სისხლის სამართლის საქმე ნივთის გაუფრთხილებლობით დაზიანების მუხლით.