სამაუწყებლო კომპანია „რუსთავი 2“ -ის გენერალური დირექტორის პირველი მოადგილის და ამავდროულად საინფორმაციო სამსახურის უფროსის ზაალ უდუმაშვილის განცხადებით, ხელისუფლება ტელეკომპანიიდან ჟურნალისტების გადაბირებას ცდილობს და ამით ტელეკომპანიის წინააღმდეგ გადამწყვეტი იერიშისთვის ემზადება. ამის შესახებ უდუმაშვილმა წუხელ, თოქ-შოუ „არჩევანის“ პირდაპირ ეთერში განაცხადა. "მე მაქვს ინფორმაცია, რომ ხელისუფლება მეორე წრეზე აპირებს წასვლას – 2012 წელს იყო უკვე მცდელობა, რომ "რუსთავი 2"-ის თანამშრომლები გადაებირებინათ ძალიან დიდი ფულის ფასად: მიჰყავდათ აბსოლუტურად ყველა, დაწყებული ცნობილი ჟურნალისტებიდან, დამთავრებული ტექნიკური პერსონალით, ოღონდ კი შიგნით რღვევა დაწყებულიყო, თუმცა არ გამოუვიდათ და ჩვენ მაშინ ეს ბრძოლა, პრაქტიკულად, უდანაკარგოდ დავასრულეთ. მე დარწმუნებული ვარ, რომ კიდევ ერთ შემოტევასაც გავუძლებთ", – განაცხადა უდუმაშვილმა. ზაალ უდუმაშვილი დარწმუნებულია, რომ რუსთავი 2 ამ შეტევასაც გაუძლებს. ამასთან, მისივე განმარტებით, "ვერ გაიგო ხელისუფლებამ, რომ "რუსთავი 2"-ს რაც უფრო მეტს ებრძვი, მით უფრო ძლიერდება". "ხელისუფლება კიდევ ნახავს, რამდენად შეგვიძლია ჩვენ გავუძლოთ ყველა დარტყმას", – აღნიშნა არხის გენერალური დირექტორის პირველმა მოადგილემ.