ზუგდიდი-ჯვარის ცენტრალურ საავტომობილო მაგისტრალზე, სოფელ ჩხორიასთან ავტოსაგზაო შემთხვევა მოხდა. სპრინტერის ტიპის მიკროავტობუსი, რომელშიც 8 უცხოელი ტურისტი იჯდა, ელექტროენერგიის გადამცემ ბოძს შეეჯახა და გადაბრუნდა. შემთხვევის შედეგად დაშავებულია 15-მდე ადამიანი, მათ შორის მიკროავტობუსის მძღოლი და გიდი. ადგილზე მობილიზებული იყო სამაშველო და სასწრაფო დახმარების ბრიგადები. საბედნიეროდ არ არის მსხვერპლი. დაშავებულები  ზუგდიდის რეფერალურ საავადმყოფოში გადაიყვანეს, მათ შორის ერთი მცირეწლოვანი ბავშვია. დაშავებულებს  პირველადი სამედიცინო დახმარება ჩაუტარდათ. მათგან სამ ტურისტს გადაუდებელი ოპერაცია დასჭირდა. ისინი, სავარაუდოდ კლინიკაში შემდგომი დაკვირვების მიზნით დარჩებიან, დანარჩენი ტურისტები კი უკვე სახლში გაეწერნენ. რაც შეეხება მომხდარს – მიკროავტობუსის ელექტრო ბოძთნ შეჯახების მიზეზად მძღოლის მიერ მართვის კონტროლის დაკარგვა სახელდება. მომხდარზე გამოძიება სსსკ-ის 276-ე მუხლის პირველი ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.