საქართველოს ფეხბურთის ფედერაციის ყოფილი პრეზიდენტი მერაბ ჟორდანია ჟურნალისტებთან საუბრისას ადასტურებს, რომ აპირებს მონაწილეობა მიიღოს ფედერაციის პრეზიდენტის არჩევნებში. აღნიშნულზე ჟორდანიამ გუშინ, ლანჩხუთის მუნიციპალიტეტში გამართული შეხვედრის შემდეგ განაცხადა, სადაც ის მუნიციპალიტეტის გამგებელს ზაზა ურუშაძეს და გურიის ფეხბურთის სამხარეო ფედერაციის პრეზიდენტს კახა ებრალიძეს შეხვდა. მერაბ ჟორდანიას განცხადებით, საარჩევნო პროცესს გურიიდან იწყებს. „მხოლოდ ის შემიძლია გითხრათ, რომ ვაპირებ საქართველოს ფეხბურთის ფედერაციის ხელმძღვანელის პოსტის დაკავებას“ – ეს განცხადება ჟორდანიამ შეხვედრის დასრულების შემდეგ ჟურნალისტებთან გააკეთა.
აღნიშნული თანამდებობა მერაბ ჟორდანიას 1998-2005 წლებში ეკავა. საეჭვო ფინანსური მაქინაციების გამო იყო დაკავებულიც, თუმცა 700 000 ლარის გადახდის შემდეგ ციხიდან გაათავისუფლეს. 2005 წელს მან საქართველოს ფეხბურთის ფედერაციის პრეზიდენტის თანამდებობა დატოვა.
მერაბ ჟორდანიას გარდა, ფეხბურთის ფედერაციის პრეზიდენტობისთვის რევაზ არველაძე, მიხეილ ყაველაშვილი და ლევან კობიაშვილიც იბრძოლებენ. როგორც კულუარებიდან ხდება ცნობილი, ფეხბურთის ფედერაციის საპრეზიდენტო არჩევნებში ხალისუფლების ფავორიტი შალკეს და საქართველოს ეროვნული ნაკრების ყოფილი ფეხბურთელი ლევან კობიაშვილი იქნება. ამბობენ, რომ კობიაშვილის კანდიდატურას ვიცე პრემიერი კახა კალაძე ლობირებს.
ავტორი: ლევან კალანდია