რამოდენიმეკვირიანი მოლაპარაკება დნეპროპეტროვსკის „დნიპროსა“ და ფრანგულ „რეიმს“ შორის დასრულდა. მიღებული გადაწყვეტილებით, საქართველოს ეროვნული ნაკრების კაპიტანი და დნიპროს ფეხბურთელი ჯაბა კანკავა სათამაშოდ ფრანგულ კლუბში გადავიდა – ქართველი ფეხბურთელი ელიტარულ დივიზიონ ლიგა 1-ში ითამაშებს. ჩვენებური 13 აგვისტოს ღამით ჩაფრინდა რეიმსში და ერთდღიანი მოლაპარაკების შემდეგ ფრანგულ კლუბს კონტრაქტის დეტალებზე შეუთანხმდა. კანკავამ სამედიცინო შემოწმებაც გაიარა, კლუბთან 4 წლიანი ხელშეკრულებაც გააფორმა და 4-ნომრიანი მაისურიც მიიღო. „ევროპაში თამაში სულ მსურდა, შანსი მომეცა და გამოვიყენე“ – ასე გამოეხმაურა ფეხბურთელი მიღებულ გადაწყვეტილებას. ფეხბურთელმა ჯერ მხოლოდ ინდივიდუალურად ივარჯიშა, დებიუტი კი, სავარაუდოდ მომდევნო ტურში შედგება – 22 აგვისტოს რეიმსი ნანტს ესტუმრება.
ავტორი: ლევან კალანდია