ზუგდიდში მარცხენა სანაპიროს ქუჩის მოსახლეობა ადგილობრივ ხელისუფლებას უყურადღებობაში ადანაშაულებს. კერძოდ, ადგილობრივი მაცხოვრებლების განმარტებით,  მდინარე ჩხოუშიის კალაპოტი დანაგვიანებულია, წყალუხვობის დროს მდინარე კალაპოტიდან გადმოდის და მოსახლეობას სახლებში უვარდება. ამასთან,მათი განმარტებით, მოუწესრიგებელია საგზაო ინფრასტრუქტურა, მდინარის დაბინძურების გამო მომრავლდნენ ქვეწარმავლები, რომლებიც მოსახლეობას სახლებში უვარდებათ. ადგილობრივების განცხადებით, მათ რამდენჯერმე მიმართეს ქალაქის მერიას, თუმცა შეპირების მიუხედავად ჯერ არაფერი გაკეთებულა. მოსახლეობის პრობლემებს დღესვე ადგილზე ნაციონალური მოძრაობის ზუგდიდის ორგანიზაციის წევრები გამოეხმაურნენ. თეიმურაზ ბასილაიას განმარტებით, პრობლემის გადაჭრა ადგილობრივი ხელისუფლების საქმეა და მან უნდა იზრუნოს მათ გადასაწყვეტად. აღნიშნულთან დაკავშირებით, ტელეკომპანია „ოდიში“  მთელი დღის განმავლობაში ცდილობდა ზუგდიდის მერიასთან დაკავშირებას, თუმცა უშედეგოდ. ქალაქის მერმა ირაკლი გოგოხიამ და მერიის ზედამხედველობის სამსახურის მონიტორინგის განყოფილების უფროსმა დიმიტრი ფაცაციამ  ჩვენს სატელეფონო ზარებს არ უპასუხეს.მერიის პრესსამსახურში კი განაცხადეს, რომ აღნიშნულ პრობლემებზე მიმდინარეობს აქტიური მუშაობა, თუმცა ოფიციალურ კომენტარს უწყება მხოლოდ ორშაბათს გააკეთებს.