ამერიკის შეერთებული შტატები სიამაყის გრძნობით ეგებება თავის მთავარ ეროვნულ დღესასწაულს – დამოუკიდებლობის დღეს, რომელიც 239 – ე წელია აღინიშნება დამოუკიდებლობის დეკლარაციის მიღების დღეს – 4 ივლისს.
სწორედ ამ დღეს, 1776 წელს ამ დღეს, მეორე კონტინენტურმა კონგრესმა მიიღო დამოუკიდებლობის დეკლარაცია, რიტაც დასრულდა დიდი ბრიტანეთის ბატონობა ჩრდილოეთ ამერიკის 13 ყოფილი კოლონიაში და იშვა ახალი სახელმწიფო, რომელიც დემოკრატიის ბურჯად იქცა მთელ მსოფლიოში.
დამოუკიდებლობის დეკლარაციის მთავარი ავტორი თომას ჯეფერსონია, დეკლარაციაზე ასევე მუშაობდნენ გამორჩეული ისტორიული ფიგურები ჯონ ადამსი და ბენჯამენ ფრანკლინი, რომელნიც არა მხოლოდ ამერიკელებისათვის იქცნენ თავისუფლების სიმბოლოდ.
დეკლარაციის ტექსტი პირველად 6 ივლისს გამოქვეყნდა გაზეთში, ხოლო . 8 ივლისს ასევე პირველად იქნა წაკითხული ფილადელფიის ცენტრალურ მოედანზე. ამ დღეს ქალაქში ტრადიციულ ბაზრობაზე მისული ამერიკელებისთვის დაირეკა თავისუფლების ზარი როგორც პირდაპირი, ისე გადატანითი მნიშვნელობით – ლეგენდის მიხედვით, სწორედ ზარმა უხმო მოქალაქეებს მოედანზე , სადაც თავისუფლების დეკლარაციის ტექსტი უნდა მოესმინათ. აქედან მოდის ლეგენდა ამერიკის ეროვნულ სიწმინდედ ქცეულ „თავისუფლების ზარზე“, რომელიც თავისუფლებისაკენ უხმობს ადამიანებს, ყველა დროსა და ყველა ქვეყანაში და მათ შორის ჩვენს სამშობლოშიც, რომელიც დამოუკიდებლობისა და თავისუფლებისათვის იბრძვის.
დღევანდელ დღეს, აშშ–ის ქალაქებში, ყველა დასახლებულ პუნქტში დილიდან გვიან ღამემდე იმართება აღლუმები და ფეიერვერკები. ყველაზე გრანდიოზული პიროტექნიკური შოუ, ტრადიციულად, ნიუ–იორკში ეწყობა ათეულ ათასობით ადამიანის თანდასწრებით. დღესასწაული მასობრივად აღინიშნება ოჯახური პიკნიკებით და უფრო ფართო თავყრილობებით, ამ მხრივ მას შობა,აღდგომა, მადლიერები დღე თუ შეედრება.
ამერიკელებს სხვადასხვა შტატში ამ დღის აღნიშვნის საერთო ეროვნულთან ერთად საკუთარი, განსაკუთრებული ტრადიციებიც აქვთ. ალიასკას შტატში, ქალაქ სიუარდში ადგილობრივები ლაშქრობას აწყობენ მაუნთ–მარათონის მთებში , პენსილვანიაში, ქალაქ ლიტიტცში სანთლების ფესტივალი იმართება, ნებრასკას შტატში, ქალაქ ტეკუმსში სასამართლოს შენობასთან, რამდენიმე ასეულ დროშას გამოფენენ, იმ ადგილობრივი მკვიდრების პატივსაცემად, ვინც ამ დროისათვის ამერიკის შეერთებული შტატების არმიაში მსახურობს. უფრო ადრე მისისიპის გასწვრივ, ორივე ნაპირზე ანთებდნენ კოცონებს, რომლებიც გათენებამდე არ ქრებოდა.
ეს დღე საზეიმოა არამხოლოდ ამერიკელებისთვის, არამედ ყველასთვის, ვისაც თავისუფლების ზარი უხმობს.