ზუგდიდის დემოკრატიული ჩართულობის ცენტრში ზუგდიდის საკრებულოს წევრებმა და საზოგადოებრივი ორგანიზაციის წევრებმა „საკრებულოს წევრთა ეთიკის კოდექსი“ განიხილეს. კოდექსის განხილვა საერთაშორისო ორგანიზაცია ენ-დი-აის ორგანიზებით ჩატარდა. შეხვედრის განმავლობაში გამოიკვეთა შენიშვნები და რეკომენდაციები, რომელიც არასამთავრობო ორგანიზაციისა და პოლიტიკური პარტიის წარმომადგენლებმა გაახმოვანეს. კერძოდ, მათი განცხადებით, იურიდიული თვალსაზრისით დოკუმენტი დასახვეწია და რიგ შემთხვევაში განსამარტია ესა თუ ის მუხლი. საკრებულოს წევრის ნაციონალური მოძრაობიდან ანი წითლიძის განცხადებით, კოდექსის პროექტში არ არის განმარტებული თუ რა შეიძლება ჩაითვალოს უპატივცემლობად და შეურაცხყოფად.კოდექსის ერთ-ერთი ავტორისა და საკრებულოს იურიდიული კომისიის თავმჯდომარის ნუგზარ სარიას განმარტებით, კოდექსზე მუშაობისას გათვალისწინებული იქნა ევროპული გამოცდილება. მისივე თქმით, მაქსიმალურად გათვალისწინებული იქნება ყველა რეკომენდაცია.საქართველოს ახალგაზრდა იურისტთა ასოციაციის ზუგდიდის ოფისის ხელმძღვანელის ნინო ხუხიას განმარტებით, სამართლებრივი თვალსაზრისით კოდექსი დახვეწას საჭიროებს.ეთიკის კოდექსის პროექტის მიხედვით, მისი მიზანია, სახელმწიფოსა და საზოგადოების წინაშე დაკისრებული პროფესიული პასუხისმგებლობის გათვალისწინებით დაადგინოს საკრებულოს წევრის მაღალი პროფესიული და ეთიკური სტანდარტები, ხელი შეუწყოს საკრებულოსადმი საზოგადოების ნდობის მოპოვებას და კეთილსინდისიერად შესრულებას. ეთიკის კოდექსის შემუშავების ინიციატივა, ქლაქის საკრებულოს უმრავლესობამ გამოთქვა, რასაც მხარი დაუჭირეს ოპოზიციური პარტიების წარმომადგენლებმაც.
ზუგდიდის საკრებულოს წევრებმა და საზოგადოებრივი ორგანიზაციის წევრებმა „საკრებულოს წევრთა ეთიკის კოდექსი“ განიხილეს (VIDEO)
Published on