საქართველოს სკოლებში დღეს გამოსაშვები გამოცდები დაიწყო. დამამთავრებელი სკოლის მოსწავლეები გამოცდებს 21-25 მაისს ჩააბარებენ. შეფასებისა და გამოცდების ეროვნული ცენტრის დირექტორის მაია მიმინოშვილის განცხადებით, მე-12 კლასელები გამოცდებს 21, 22, 23, 24 მაისს ჩააბარებენ და შემდეგი თანმიმდევრობით ჩატარდება – ქართული ენა და ლიტერატურა, უცხო ენა, ისტორია და მათემატიკა. გამოცდის ჩაბარების შესაძლებლობა დღის მეორე ნახევარში იმ მოსწავლეებსაც შეეძლებათ, რომელთაც მე-11 კლასში გამოცდა არ ჩაუბარებიათ. განათლების სამინისტროს ინფორმაციით, მე-11 კლასელების გამოცდები 11 ივნისს დაიწყება და 20 ივნისს დასრულდება. მე-11 კლასელები სასწავლო წლის ბოლოს იმ საგნებს აბარებენ, რომლის სწავლაც დაასრულეს. გამოცდები 16, 17, 18, 19 ივნისს გეოგრაფიაში, ბიოლოგიაში, ქიმიაში და ფიზხიკაში ჩატარდება.
ზუგდიდის სკოლებში მე-12 კლასელთა ქართული ენისა და ლიტერატურის გამოცდები დილის 9 საათზე დაიწყო. მე-12 კლასის მოსწავლეების განცხადებით, საგამოცდო ტესტები საშუალო სირთულის იყო
„ჩემი შედეგით საკმაოდ კმაყოფილი ვარ, საშუალო სირთულის ტესტები იყო. საკმაოდ ბევრი კითხვა მომივიდა როგორც ენიდან, ასევე ლიტერატურიდან, თითქმის ყველა ნაწარმოები შედიოდა, რაც გავიარეთ და ვფიქრობ, რომ ბავშვები წარმატებით გაართმევენ თავს ტესტებს“ – განაცხადა ჩვენთან საუბარში ზუგდიდის პირველი საჯარო სკოლის მე-12 კლასის მოსწავლემ ელენე გოგოხიამ
„სკოლაში კომფორტული გარემოა შექმნილი იმისთვის, რომ მოსწავლემ ჩააბაროს გამოცდები. თითოეულ მოსწავლეს განემარტა იმ პროცესებისა და პროცედურების შესახებ, რაც ახლავს ამ გამოცდას და არავის დაბრკოლება არ ჰქონია იმასთან დაკავშირებით, რომ რომელიმეს გაძნელებოდა ამ გამოცდის ჩაბარება“ – განაცხადა ჩვენთან საუბარში ზუგდიდის პირველი საჯარო სკოლის დირექტორმა ნინო გოგინავამ
სკოლის გამოსაშვები გამოცდები ასევე მშვიდ გარემოში მიმდინარეობდა ზუგდიდის მე-6 საჯარო სკოლაში.
„მე-12 კლასელებმა დღეს ქართული ენისა და ლიტერატურის გამოცდა ჩავაბარეთ. არ იყო ძალიან რთული, იყო ნორმალური საკითხებიდა ვფიქრობ, რომ ყველამ წარმატებულად გავართვით თავი“ – განაცხადა ჩვენთან საუბარში ზუგდიდის მე-6 საჯარო სკოლის მე-12 კლასის მოსწავლემ მარიამ სორდიამ
განათლების სამინისტროს ზუგდიდის რესურსცენტრის ხელმძღვანელის გონერი პაპავას თქმით, ზუგდიდის 50 საჯარო და 4 კერძო სკოლაში საატესტატო გამოცდების პროცესი მშვიდად მიმდინარეობს.
„განათლებისა და მეცნიერების სამინისტროს და გამოცდების ეროვნული ცენტრის მიერ ერთობლივად ხორციელდება საატესტატო გამოცდების ნორმალურ პროცესებში ჩატარება. გამოცდების ეროვნულმა ცენტრმა დროულად მიავლინა ყველა სკოლაში დამკვირვებლები, მეთვალყურეები, რომლებიც პასუხისმგებელნი არიან გამოცდების ხარისხიანად ჩატარებასთან დაკავშირებით. ყველა სკოლაში კომპიუტერული ტექნიკა გამართულია, ყველა სკოლას მიეწოდება შეუფერხებლად ელექტროენერგია, თუმცა ინტერნეტქსელის გადატვირთვის გამო რამოდენიმე სკოლაში, გამოცდების მეორე სესიაზე მცირე დროით შეფერხდა ინტერნეტის მიწოდება, თუმცა ცენტრალური სისტემის დახმარებით, პრობლემა მალე აღმოიფხვრა. 16 საათისთვის ყველა საჯარო თუ კერძო სკოლაში გამოცდები დასრულებული იქნება“ – განაცხადა ზუგდიდის რესურსცენტრის ხელმძღვანელმა გონერი პაპავამ
შეფასებისა და გამოცდების ეროვნული ცენტრის დირექტორის მაია მიმინოშვილის ინფორმაციით, გამოსაშვები გამოცდები საქართველოს მასშტაბით დაახლოებით 1600 საჯარო და კერძო სკოლაში ჩატარდება. გამოცდებზე დაახლოებით 44 000 მე-12 და 41 500 მე-11 კლასელი გავა. გამოსაშვები გამოცდები CAT – ის (კომპიუტერზე ადაპტირებული ტესტირება) პრინციპით ტარდება და მოსწავლეები შედეგებს ადგილზე იგებენ.
–
ლევან კალანდია