მუზეუმის საერთაშორისო დღეს თბილისში ხელოვნების სასახლეში გაიხსნა ზუგდიდის დადიანების სასახლეებში დაცული სამეგრელოს მთავრების უნიკალური საგანძურის გამოფენა.
ხელოვნების სასახლის საექპსოზიციო დარბაზებში წარმოდგენილია ნაპოლეონ პირველის ნიღაბი, საფრანგეთისა და რუსეთის საიმპერატორო ოჯახების ძვირფასი ნივთები, ფაიფური და ბროლი. აქვე იხილავთ ეკატერინე ჭავჭავაძისა და ნიკო დადიანისთვის ექსკლუზიურად დამზადებულ ჭურჭელს.
თბილისში პირველად იფინება დადიანების სამხედრო კოლექცია, მათ შორის გამორჩეულია ოქროთი და ვერცხლით მოსევადებული ცეცხლსასროლი იარაღი, ფრანგული შაშხანები, ოსმალური დამბაჩები, ქართული ხმლები.
გამოფენაზე წარმოდგენილია ოქროს ალბომი, რომელიც დადიანებს იმპერატორმა ალექსანდრე მესამემ აჩუქა, ჩინეთის იმპერატორის მიერ საჩუქრად გამოგზავნილი ძვირფასი ლარნაკი და სხვ.
გამოფენა ივლისის ბოლომდე გაგრძელდება.