8 თებერვალს, 10:00 საათზე, „თავისუფლებათა ქარტიის“ ფარგლებში პირველი სახალხო არჩევნები გაიხსნება წალენჯიხის მუნიციპალიტეტის სოფლებში ნაკიფუსა და მიქავაში, რაც გულისხმობს, რომ 14 ადმინისტრაციულ ერთეულში სახალხო არჩევნები ჩატარდება და გუნდები (1/2) წარმომადგენლებს აირჩევენ, რომელნიც შემდგომში აქტიურ მონაწილეობას მიიღებენ მუნიციპალიტეტში, ცალკეულ ადმინისტრაციულ ერთეულებში მიმდინარე პოლიტიკურ, კულტურულ, ეკონომუკურ და სოციოლურ პროცესებში.

“ეს უპრეცედენტო მოვლენაა, როდესაც ხალხს უბრუნდება ხელისუფლება. ამ ადამიანებს არ ექნებათ ხელფასი – ეს ნებაყოფლობითი სამოქალაქო აქტივიზმია. შესაბამისად, არ ხარ დამოკიდებული არავის ხელფასზე, ხარ თავისუფალი და ხელისუფლებასთან ერთად გარკვეული სახის მონიტორინგის როლსაც ასრულებ. ამიტომ ეს უპრეცედენტო, გამორჩეული და ძალიან მნიშვნელოვანი მოვლენაა. ასე ჩატარდება 14-ვე ადმინისტრაციულ ერთეულში არჩევნები და ჯამში, 98 ადამიანი გვეყოლება.”- აცხადებენ ქარტიაში.

სათემო საზოგადოებრივი საბჭოები არის მერთან არსებული მუდმივმოქმედი, არჩევითი სათათბირო ორგანო, რომლის ფუნქციაა კონკრეტულ თემთან დაკავშირებულ საკითხებზე გადაწყვეტილების შემუშავება, მიღებასა და მათ აღსრულებაზე საზოგადოებრივი ჩართულობის უზრუნველყოფა.
სათემო საზოგადოებრივი საბჭოები არის წალენჯიხის მუნიციპალიტეტის ახლადარჩეული მერის – გიორგი ხარჩილავას მიერ მიღებული “წალენჯიხის თავისუფლებათა ქარტიის” ერთ-ერთი მექანიზმი. ქარტია მიზანს ისახავს მოქალაქეთა ჩართულობის, თანამმართველობის რეალური მექანიზმების დანერგვას და წალენჯიხის მაგალითზე ძალაუფლების დეცენტრალიზაციის, მოქალაქეთა ჩართულობის პრეცედენტის შექმნას.