ბუენოს-აირესის პროვინციის უსაფრთხოების სამსახურის უფროსმა იმ მოქალაქეებს, ვინც ბოლო 24 საათის მანძილზე ბუენოს აირესში კოკაინი შეიძინა, მისი გადაყრისკენ მოუწოდა. ამის მიზეზი ისაა, რომ შესაძლოა, კოკაინში რაიმე მომწამვლელი ნივთიერება ან სუბსტანცია იყოს გარეული.
ფალსიფიცირებულმა კოკაინმა არგენტინის დედაქალაქ ბუენოს აირესში სულ მცირე 16 ადამიანი იმსხვერპლა, 50 ადამიანი კი საავადმყოფოშია გადაყვანილი.
ადგილობრივი მედიის ცნობით, ფალსიფიცირებული კოკაინი მომხმარებლებმა ქალაქის ერთსა და იმავე რაიონში შეიძინეს. ამ დრომდე დაკავებულია 9 ადამიანი.
სამართალდამცველებმა დაკავებულებს დიდი რაოდენობით ნარკოტიკული საშუალებები ჩამოართვეს და შესადარებლად გარდაცვლილთა გაკვეთის შედეგებს ელოდებიან.