მძიმე სოციალური ფონისა და ხელისუფლების უყურადღებობის გამო, შეზღუდული შესაძლებლობის მქონე პირის დედამ ბიძინა ივანიშვილის რეზიდენციასთან სუიციდი სცადა.
თამუნა იარაჯულმა პროტესტის უკიდურეს ფორმას მას შემდეგ მიმართა, რაც გაზი ჩაუჭრეს და მის შეზღუდული შესაძლებლობის მქონე შვილს სიცივეში ყოფნა გაუჭირდა.
ქალმა გაზრდილი ტარიფის გამო, დავალიანების გადახდა ვერ შეძლო და კომპანიისგან თარიღის გადავადებას ითხოვდა.
მწვავე პროტესტი, თამუნა იარაჯულმა ჯერ კანცელარიის შენობაში გამოხატა და პრემიერთან შეხვედრას უშედეგოდ ითხოვდა, მოგვიანებით კი ივანიშვილის სასახლესთან მისვლა გადაწყვიტა. მომხდარის გამო მრავალშვილიანი დედა, პოლიციაში გუშინ გამოკითხეს.
“ბატონო ბიძინა, რატომ დაგვიტოვეთ ისეთი მთავრობა, რომელმაც ბიუჯეტი ჩაიდო ჯიბეში, ქვეყანა ჩაიდო ჯიბეში და ჩვენი შვილები უნდა გაიყინონ ამ ზამთარს, უნდა დაიხოცონ. ერთი წამი იყო გაელვება, რომ იქნებ მე რომ აღარ ვიქნები, ყველას ეშველოს-მეთქი. როგორ მივიდე და ვუთხრა აუტიზმის მქონე შვილს, რომ დაწვეს სითბოში, ჰიპერაქტიურია, უნდა ირბინოს. ხომ შეიძლება ქვეყანამ იმუშაოს ისე, რომ მარტო მანქანები არ შევიძინოთ ყოველწლიურად მილიონობით საფასური, ამ ქვეყანაში მარტო თქვენ შვილებს არ წაუღოთ და ნამცეცები მაინც გადაუყაროთ სხვის შვილებს. ხომ შეიძლება, რომ ჩვენმა შვილებმაც იცხოვრონ?! ყველა ვერ გავიქცევით ამ ქვეყნიდან”, – თქვა თამუნა იარაჯულმა.
მოგვიანებით მან სოციალურ ქსელში ულტიმატუმის პირობები დაწერა და პრემიერს 3-დღიანი ვადა მისცა. მრავალშვილიანი დედა, პენსიის მინიმუმ 300 ლარამდე გაზრდას, ასევე ყველა შეზღუდული შესაძლებლობის მქონე პირისთვის, საყოველთაო დაზღვევას ითხოვს, სადაც გამოკვლევის, მკურნალობისა და მედიკამენტების პაკეტი იქნება და მესამე – მისი მოთხოვნაა, ზამთრის პერიოდში არავის შეუწყვიტონ ელექტროენერგია და ბუნებრივი აირი.
მრავალშვილიანი დედა გავრცელებულ პოსტში მადლობას უხდის იმ ადამიანებსაც, ვინც მისი დავალიანება დაფარა. ბუნებრივი აირის მიწოდება მას მხოლოდ ამის შემდეგ აღუდგინეს.