ელენე ხოშტარია საქართველოს პრეზიდენტს, სალომე ზურაბიშვილს მიმართავს, ვეტო დაადოს საერთო სასამართლოების შესახებ კანონს, ასევე, სახელმწიფო ინსპექტორის სამსახურის გაუქმების ინიციატივას.
“მინდა უკიდურესი პროტესტით გამოვეხმაურო ქართული ოცნების შემაშფოთებელ ინიციატივებს. ქართულმა ოცნებამ ღრმა პოლიტიკური კრიზისის ფონზე და მათი გადმოსახედიდან მშვიდ პერიოდში, სამი ძალიან საგანგაშო პროცესი წამოიწყო.
პირველი – სახელმწიფო ინსპექტორის სამსახურის გაუქმება, მეორე – საერთო სასამართლოების კანონში ცვლილებები, მესამე – ცესკოს თავმჯდომარის და წევრების არჩევის წესი. სამივე საკანონმდებლო ინიციატივა არის ძალიან ღია დემონსტრაციული თავდასხმა ინსტიტუტებზე – სახელმწიფოს მიტაცების ძალიან თავხედური აქტი”. – თქვა ელენე ხოშტარიამ.
მისი შეფასებით, სახელმწიფო ინსპექტორის სამსახური დიდი საერთაშორისო ძალისხმევით შეიქმნა.
“ქართულ ოცნება ფიქრობდა, რომ მსგავსი ინსტიტუტის შექმნა უბრალოდ ფორმალური ინსტიტუტების იმიტაცია იქნებოდა და ისინი ისევე მონურად დაიმორჩილებდნენ, როგორც იმორჩილებენ სხვა ინსტიტუტებს”. – ამბობს ელენე ხოშტარია.
რაც შეეხება საერთო სასამართლოების შესახებ კანონს, ელენე ხოშტარიას შეფასებით, ეს არის „რეპრესიები ე.წ. ურჩი მოსამართლეების მიმართ“.
ხვალ, 30 დეკემბერს ელენე ხოშტარია ამ საკითხებზე სასაუბროდ დიპლომატიური კორპუსის წარმომადგენლებსაც შეხვდება.