დღეს თბილისის საქალაქო სასამართლოში ბადრი ჯაფარიძის, მამუკა ხაზარაძისა და ავთანდილ წერეთლის საქმეზე ბოლო სასამართლო სხდომა გაიმართება.

„ლელოს“ ლიდერებსა და „ტვ პირველის“ მფლობელის მამას პროკურატურა ედავება ჯგუფურად 16 754 000 ამერიკული დოლარის “უკანონო შემოსავლის ლეგალიზაციას, რასაც თან ახლდა განსაკუთრებით დიდი ოდენობით შემოსავლის მიღება”. საქმე ეხება 2008 წელს განხორციელებულ ტრანზაქციას.

სასამართლო პროცესი ორ წელზე მეტია მიმდინარეობს. ბრალდებულები ამბობენ, რომ ფულის გათეთრება არ ყოფილა და დანაშაულიც არ არსებობს, რადგან საქმეში არ არის არც ერთი დაზარალებული.

გუშინ „ლელოს“ ლიდერმა მამუკა ხაზარაძემ ფეისბუკზე დაწერა: „დღესაც ვამაყობთ, რაც 2008 წელს გავაკეთეთ; გადავარჩინეთ საქართველოს საბანკო-საფინანსო სისტემა ჩამოშლას ჩვენი პირადი ინტერესის ხარჯზე, გადავარჩინეთ მეანაბრეები თანხის დაკარგვას, ათასობით “თიბისელი” სამსახურიდან განთავისუფლებას; ახლაც ზუსტად იმავეს გავაკეთებდით; ვერ შეგვაშინებთ, ვერ გაგვაჩერებთ, ანაკლიასაც ავაშენებთ და სამართლიან სახელმწიფოსაც“.