გაზეთ ქრონიკა პლიუსის დამფუძნებელი და მთავარი რედაქტორი ელისო კილაძე “ქართული ოცნების” ახალ გეგმას ასაჯაროვებს და წერს, რომ გლდანის ციხის საავადმყოფოში, ე.წ. რეზბალნიცაზე მიხეილ სააკაშვილის მოტყუებით გადაყვანის კვალდაკვალ, იქ სხვადასხვა დანაშაულისთვის მსჯავრდებულთა გადმოყვანა იგეგმება, რომლებიც, შესაძლოა, მიხეილ სააკაშვილს ფიზიკურად გაუსწორდნენ. 

ელისო კილაძე იმ გეგმაზეც წერს, თუ რა სქემით აპირებს ხელისუფლება პატიმრების გადაყვანას ციხის საავადმყოფოში:

“ციხეში შინაგანაწესის მიხედვით 10 საათზე აქრობენ შუქებს, გუშინ 12 საათზე გაჩირაღდნებული იყო ყველა ფანჯარა და პატიმრები ნიშნის მიღების შემდეგ იწყებდნენ გინებას”, – თქვა ელისო კილაძემ. 

შეგახსენებთ, სახალხო დამცველმაც არ გამორიცხა, რომ შესაძლოა, პატიმრებს წინასწარ მიეწოდებოდათ ინფორმაცია იმის შესახებ, თუ ვინ შედის ციხეში:

“ვერ გამოვრიცხავ იმას, რომ ეს შეიძლება, ყოფილიყო გარკვეული ჯგუფის პატიმრების მხრიდან ორგანიზებული და კოორდინირებული, თუმცა მე ამის მტკიცებულებები არ მაქვს, ერთადერთი, რაც შეიძლება ვთქვა: სრულიად შეფუთული შევდივარ მე პირადად ციხეში. რამდენიმე წამი დამჭირდა, სანამ შევიდოდი მანქანიდან მე-18 დაწესებულებაში, ალბათ და ამ რამდენიმე წამის განმავლობაში ჩემს გვარსაც სკანდირებდნენ. რა თქმა უნდა, ეჭვებს აჩენს, როგორ შეიძლებოდა, ეს დაეფიქსირებინათ ისე, რომ ეს არ ყოფილიყო კოორდინირებული, ან წინასწარ ორგანიზებული”,- თქვა ნინო ლომჯარიამ “ფორმულასთან”.